Qora dengizning Turkiya sohillari yaqinidagi qismida Rossiya “soya floti”ga tegishli ikki kema yonib ketdi

Bu haqda 28 noyabr kuni kechqurun Turkiya ommaviy axborot vositalari xabar berdi.

Yonib ketgan kemalardan biri Hindistondan Rossiyaga yo‘l olgan Kairos neft tankeri bo‘lgan. Mahalliy port boshqarmasi ma’lumotiga ko‘ra tanker qirg‘oqdan 28 dengiz milyasi masofasida minaga duch kelgan. Turkiya dengizchilik boshqarmasi bu ma’lumotni tasdiqlab, kema bortida “tashqi ta’sir” tufayli yong‘in kelib chiqqanini va undan 25 kishi evakuasiya qilinganini bildirdi.

Oradan ko‘p o‘tmay, Rossiyaga yo‘nalgan Virat tankeridagi yong‘in haqida xabar berildi. Kema ekipaji darhol evakuasiya qilingan. Turkiya rasmiylari bu hodisa tafsilotlarini ochiqlamadi, ammo har ikkala tanker ham yuksiz bo‘lganini bildirdi.

Kairos ham, Virat ham Gambiya bayrog‘i ostida suzadi. Ushbu tankerlar Rossiya tomonidan Ukrainaga hujum boshlanganidan keyin joriy etilgan neft sanksiyalarini chetlab o‘tish uchun foydalaniladi, shuning uchun “soyadagi flot” deb ataladigan kema guruhiga mansub, deb hisoblanadi. Ushbu tankerlar G‘arb sanksiyalari ro‘yxatiga kiritilgan.