BBC: Pokiston va Afg‘oniston chegarasida yana qurolli to‘qnashuvlar bo‘lib o‘tdi, halok bo‘lganlar va yaralanganlar bor

Xabar berilishicha, Afg‘onistonning Qandahor viloyatiga qarashli Spin-Boldak chegara shahri hududida taxminan to‘rt soatlik janglar yuz bergan. Qandahor shahridagi BBC manbasining aytishicha, mahalliy kasalxonaga to‘rt nafar halok bo‘lganlarning jasadlari olib kelingan. Pokiston tomoni esa uch kishi yaralanganini bildirmoqda.

"Tun davomida Spin-Boldakdan qochqinlar oqimi kelgan. Qo‘shni aholi punktlarining aholisi ham hududni tark etmoqda", — deydi nashr manbalaridan biri.

So‘nggi oylar davomida ikki mamlakat o‘rtasida bir necha bor qurolli to‘qnashuvlar yuz bergan, “Tolibon” Pokistonni Afg‘oniston hududiga havo zarbalari yo‘llaganlikda ayblagan. Pokiston esa “Tolibon”ni Pokistonda hujumlar uyushtirayotgan terrorchi guruhlarga boshpana berganligini ta’kidlamoqda. “Tolibon” hukumati Pokiston o‘zining “xavfsizlik tizimidagi xatolari uchun boshqalarga ayb qo‘yayotganini” aytgan. Hozir ikkala tomon ham bir-birini Qatar va Turkiya vositachiligida ikki oy avval o‘rnatilgan o‘t ochishni to‘xtatish rejimini buzganlikda ayblamoqda.

Pokiston bosh vaziri Shahboz Sharifning vakili Musharraf Zaidi “Tolibon”ni “sababsiz o‘q uzish”da ayblagan, “Tolibon” vakili esa Pokiston “yana hujumlarni boshlab yuborganini”, ular esa javob qaytarishga majbur bo‘lganini bildirgan.

O‘tgan hafta ikki tomon delegasiyalari tinchlik kelishuvini muhokama qilish bo‘yicha to‘rtinchi raund muzokaralar uchun Saudiya Arabistonida uchrashgan, biroq kelishuvga erishilmagandi.