«Qaynopam uyga kiritmayapti…»
— Bir oy oldin erim bilan rasman ajrashdik. Sudda kelin bo‘lib tushgan xonadonimda yashash va foydalanish huquqi berildi. «O‘g‘lim bilan bizga ajratilgan ikki xonaga kirib yashaymiz», desak qaynopam to‘sqinlik qilyapti. Kunora eshik qulfini o‘zgartiradi. Bu vaziyat yuzasidan sudga shikoyat qilishim mumkinmi? Moddiy ahvolim yaxshi bo‘lmagani uchun davlat bojini kechiktirish, javobgardan undirishni so‘rasam bo‘ladimi?
Ismi sir tutildi.
Murojaatga fuqarolik ishlari bo‘yicha Uchtepa tumanlararo sudi sudyasi Lola O‘TANBOYEVA javob berdi:
— Fuqarolik prosessual kodeksining 16-moddasiga ko‘ra “Sudning qonuniy kuchga kirgan hujjatlari barcha davlat organlari va boshqa organlar, tashkilotlar, mansabdor shaxslar va fuqarolar uchun majburiydir hamda O‘zbekiston Respublikasining butun hududida ijro etilishi lozim. Sud hujjatini bajarmaslik qonunda nazarda tutilgan javobgarlikka sabab bo‘ladi.
Sud hujjatining majburiyligi manfaatdor shaxslarni o‘z huquqlari va qonun bilan qo‘riqlanadigan manfaatlarini himoya qilish uchun, basharti bularga daxldor nizo sudda ko‘rib chiqilmagan va hal etilmagan bo‘lsa, sudga murojaat qilish imkoniyatidan mahrum etmaydi.
Nizo sudda ko‘rib chiqilganligi sababli siz mazkur qarorning ijrosi yuzasidan xududiy MIBga murojaat qilishingiz lozim.
“Sud xujjatlari va boshqa organ xujjatlarini ijro etish to‘g‘isida”gi Qonun va Ma’muriy javobgarlik to‘g‘risidagi kodeksning 1981-moddasiga asosan Ijro hujjatini ijro etmaganlik, shuningdek uning ijrosiga to‘sqinlik qilganlik qonunda nazarda tutilgan javobgarlikka sabab bo‘ladi.
Savolingizning ikkinchi qismiga kelsak, Fuqarolik prosessual kodeksining 133-moddasiga ko‘ra davlat bojini to‘lashni kechiktirishga qonunchilikda belgilangan hollarda yo‘l qo‘yiladi. Ya’ni, sud taraflarning mulkiy ahvoliga qarab, ulardan birining yoki ikkalasining davlat daromadiga undiriladigan sud xarajatlarini to‘lashni kechiktirishga yoki bo‘lib-bo‘lib to‘lashga yo‘l qo‘yishi, shuningdek bu xarajatlarning miqdorini kamaytirishi mumkin.
