Qashqadaryoda kuchli sel Jiguli va Labo mashinalarini oqizib ketdi
Ijtimoiy tarmoqlarda Dehqonobod tumani Tog‘aytemir mahallasi hududidan oqib o‘tuvchi soyda kuchli sel kelib ikkita mashinani oqizib ketgani haqida xabarlar tarqaldi. Qashqadaryo viloyati Favqulodda vaziyatlar boshqarmasi axborot xizmati yuqoridagi holatlar bo‘yicha ma’lumot berdi.
Unda ma’lum qilinishicha, 2022 yil 5 may kuni soat 16:00 lar atrofida Dehqonobod tumani Tog‘aytemir mahallasi hududidan oqib o‘tuvchi soyda kuchli sel kelishi kuzatilgan. Ammo ushbu selda mashinalar oqqani to‘g‘risida tuman FVB tuman qutqaruv bo‘limiga xabar kelib tushmagan.
Soha vakillari tomonidan voqea joyi o‘rganilganda Dehqonobod tumani Do‘stlik mahallasida yashovchi 1996 yilda tug‘ilgan fuqaro A.O‘.ga tegishli davlat raqami 70 L 941 OA bo‘lgan VAZ 2106 Jiguli mashinasini sel oqizib ketgani ma’lum bo‘lgan.
Foto: Qashqadaryo viloyati FVB
Qayd etilishicha, hodisa oqibatida butunlay yaroqsiz holga kelgan Jigulini mahalliy aholi yordami bilan seldan chiqarib olingan. Hodisada hech kim tan jarohati olmagan va aholi xonadonlariga zarar yetmagan.
Shuningdek, ijtimoiy tarmoqlarda Tog‘aytemir mahallasi bo‘ylab oqqan selda Labo mashinasi va uning haydovchisi oqib ketgani aytilgan xabarlar tarqaldi. Xabarda aytilishicha, bu bo‘yicha ham tuman va viloyat FVBga xabar kelib tushmagan.
Hodisa yuzasidan o‘rganish ishlari olib borilmoqda va uning natijalari haqida xabar berilishi ma’lum qilingan.
