Kreml Bokuni kechirishga chaqiradi

Moskva Ozarbayjon bilan ittifoqchilik munosabatlarini saqlab qolishni xohlamoqda, har ikki mamlakat o‘rtasidagi keskinlikka qaramay. Bu haqda Rossiya Prezidenti matbuot kotibi Dmitriy Peskov bayonot berdi va mavjud muammolarni konstruktiv hal etish zarurligini ta’kidladi.

🗣 «Biz hali ham shunga ishonamiz: Rossiya va Ozarbayjon yaqin hamkor, ittifoqchi bo‘lib qolishi kerak. Ular o‘zaro umumiy tarix, umumiy bugun va umumiy kelajak bilan bog‘langan», — dedi Kreml vakili.

Peskov so‘zlariga ko‘ra, Rossiya Ozarbayjonda ushlangan fuqarolari manfaatlarini faol himoya qilmoqda. «Bizning elchixonamiz va diplomatik idoralarimiz ozarbayjonlik hamkasblari bilan doimiy aloqada bo‘lib, ushlangan rossiyaliklarning huquqlarini himoya qilmoqda», — dedi u.

Rossiya va Ozarbayjon o‘rtasidagi munosabatlardagi keskinlik Yekaterinburgda bo‘lib o‘tgan kuch ishlatish amaliyotidan so‘ng boshlandi — unda ikki nafar ozarbayjonlik halok bo‘ldi. Javob tariqasida Boku Sputnik tahririyatida reyd o‘tkazib, bir necha jurnalistni ushladi va 1 iyul kuni narkotrafikda ayblangan rossiyaliklar guruhi qamalganini e’lon qildi.

Shundan so‘ng har ikki tomon nota yo‘lladi va elchilar chaqirildi.