Putin G‘azodagi rossiyaliklarni evakuasiya qilishga buyruq berdi

Rossiya Prezidenti Vladimir Putin Rossiya va MDH davlatlari fuqarolarini G‘azo sektoridan evakuasiya qilish to‘g‘risidagi buyruqni imzoladi.

Putin Rossiya Tashqi ishlar vazirligiga Tashqi razvedka xizmati va Favqulodda vaziyatlar vazirligi bilan birgalikda G‘azo sektoridagi vaziyatning avj olishini hisobga olgan holda fuqarolarni evakuasiya qilishning aniq muddati va formatini belgilashni buyurdi.

Favqulodda vaziyatlar vazirligiga TIV bilan kelishilgan holda evakuasiya qilingan fuqarolarni Moskvaga etkazib berishni ta’minlash topshirildi.

“Isroil davlati Qurolli Kuchlarining harbiy amaliyoti oqibatida G‘azo sektoridagi vaziyatning keskin yomonlashuvi munosabati bilan Rossiya Federasiyasi fuqarolari va shunday istakni bildirgan MDHga a’zo davlatlarning fuqarolarini G‘azo sektoridan evakuasiya qilish ta’minlansin”, deyiladi Prezidentning huquqiy axborot portalida e’lon qilingan buyrug‘ida.

Hujjat bugun, 20 may sanasida imzolangan va shu kundan boshlab kuchga kirdi.