Prezident Qo‘qon va Marg‘ilonni har tomonlama yangilashda uch yo‘nalish muhim ahamiyatga ega ekanini ta’kidladi

O‘zbekiston Respublikasi Prezidenti Shavkat Mirziyoyev 7 oktyabr kuni xorijiy mamlakatlar bilan erishilgan kelishuvlar ijrosi, yangi investisiyaviy va ijtimoiy-iqtisodiy loyihalar muhokamasiga bag‘ishlangan yig‘ilish o‘tkazdi. Bu haqda prezident matbuot xizmati xabar bermoqda.

Avval Birlashgan Arab Amirliklari bilan hamkorlikdagi investisiya loyihalarining ijrosi ko‘rib chiqildi. Joriy yil mart oyida davlatimiz rahbarining ushbu mamlakatga rasmiy tashrifi juda samarali bo‘lgan, erishilgan kelishuvlarni amalga oshirish bo‘yicha aprel oyida “yo‘l xaritasi” ishlab chiqilgandi.

Undan ko‘plab istiqbolli loyihalar o‘rin olgan. 300 million dollar evaziga Samarqand shahri infratuzilmasini rivojlantirish, Navoiy viloyatida 200 million dollarlik shamol va 150 million dollarlik quyosh elektr stansiyalari qurish, 203 million dollar evaziga Sirdaryo viloyatida sellyuloza, omuxta yem va qurilish materiallari ishlab chiqaruvchi agrosanoat klasteri tashkil etish loyihalari shular jumlasidandir.

Mutasaddilar investisiya o‘zlashtirilishi boshlangan loyihalar ijrosining borishi bo‘yicha hisobot berdi. Shuningdek, neft-gaz, kimyo, energetika, meva-sabzavotlarni qayta ishlash sohalaridagi istiqbolli loyihalar muhokama qilindi.

Davlat rahbari bu boradagi ishlarning, qurilajak zavod va korxonalarning iqtisodiy va ijtimoiy ahamiyatiga e’tibor qaratib, ularni tez va puxta amalga oshirish lozimligini ta’kidladi. Yangi loyihalar bo‘yicha muzokaralarni yakunlab, qurilish ishlarini boshlash bo‘yicha tegishli topshiriqlar berdi.

Yig‘ilishda joriy yil yanvar-sentyabr oylarida eksport va investisiya prognoz ko‘rsatkichlarining ijrosi holati hamda yil yakuni bo‘yicha ushbu yo‘nalishlarda amalga oshirilishi zarur bo‘lgan choralar ham ko‘rib chiqildi. To‘qqiz oylikda eksport hajmi qariyb 10 milliard AQSh dollarini tashkil etib, reja oshig‘i bilan bajarilgan. Eksport nomenklaturasi 74 ta yangi turdagi mahsulot, geografiyasi 42 mamlakatga kengaydi. O‘sish sur’ati asosan meva-sabzavotchilik, to‘qimachilik, avtomobilsozlik, energetika tarmoqlari hissasiga to‘g‘ri kelgan.

Shu bilan birga, ayrim tashkilot va hududlarda rejalashtirilgan prognoz bajarilmagani ko‘rsatib o‘tildi. Yil yakuniga qadar bu boradagi qoloqlikni bartaraf etish, barcha tarmoqlar va hududlar bo‘yicha eksport prognozini bajarish yuzasidan topshiriqlar berdi.

Yig‘ilishda Qo‘qon va Marg‘ilon shaharlarini 2020-2022 yillarda kompleks ijtimoiy-iqtisodiy rivojlantirish dasturi ham muhokama qilindi. Dasturga muvofiq, Qo‘qon shahrida umumiy qiymati 420 million dollarlik 250 ta, Marg‘ilon shahrida 192 million dollarlik 172 ta loyiha amalga oshirilishi belgilangan.

Ajratilayotgan investisiyalar ushbu shaharlar infratuzilmasini rivojlantirish, ijtimoiy sharoitlarni yaxshilash va yangi turar joylar qurishga yo‘naltiriladi.

Prezident mazkur uch yo‘nalish Qo‘qon va Marg‘ilonni har tomonlama yangilash, odamlar hayot sifatini oshirishda muhim ahamiyatga ega ekanini ta’kidladi.

Toshkent shahrida o‘tkazilgan Turkiy tilli davlatlar Ishbilarmonlari kengashi va biznes-forum yakunlariga ham e’tibor qaratildi.

Avval berilgan topshiriqlar yuzasidan mutasaddilarning axboroti tinglandi va kelgusida amalga oshiriladigan ustuvor vazifalar belgilab olindi.