Namanganda IIB xodimlari sotuvchini ayamay do‘pposlashdi

Aybi yo‘q odamlarni aybdor qilish, qotilliklarni bo‘yniga ilish bilan qo‘rqitish, kaltaklash va zug‘um o‘tkazish...

Namangan viloyat ichki ishlar boshqarmasining Jinoyat qidiruv boshqarmasi katta tezkor vakillari Jamoliddin To‘rayev va Xolmurod Egamberdiyevlar o‘zi xon, ko‘lankasi maydon bo‘lgan xodimlardan bo‘lib chiqdi.

Gap shundaki, boshqarma topshirig‘i bilan Pop tumaniga kelgan ikkala tezkor vakil tumanning A.Navoiy mahallasi hududidagi «Lazzat» kafesidan “Fast-food" yeguligini sotib olishadi. Biroq kafeda bo‘sh o‘rindiqlar bo‘lmagani uchun qo‘shni “Ifora” nomli muzqaymoq shoxobchasiga kirib tamaddi qilishadi. So‘ngra “Fast-food«ning chiqindisini shoxobcha hududiga tashlashadi. Bu mahal esa “Ifora” sotuvchisi Doniyor G‘oipov tozalov ishlarini amalga oshirayotgan edi.

Sotuvchi yigit ham iltimos, ham tanbeh ma’nosida ularga «Akalar, chiqindisini bu yerga tashlamang. Ko‘ryapsizlar, hamma yoqni tozalayapman», deydi. Ammo D.G‘oipov niqobini yechib qo‘ygan holda ishlayotgandi. Mazkur holat esa IIB xodimlariga juda qo‘l keladi.

X.Egamberdiyev uyali telefonida Doniyorni suratga oladi. O‘z navbatida xodimlar ham niqobsiz holatda bo‘lib, karantin qoidalariga amal qilishmagandi.

Shu bois mezbon yigit ham ularni mobil telefoni orqali suratga tushiradi. Pirovardida D.G‘oipov hamda xodimlar o‘rtasida og‘zaki tortishuv yuz beradi. Qolaversa, Xolmurod Doniyorning uyali telefonini olib qo‘yadi.
So‘ng Jamoliddin ikkalasi uning qo‘llarni qayirib, tuman ichki ishlar bo‘limiga olib ketishadi.

IIB binosiga olib kirgach esa D.G‘oipovning qorin va yuz qismiga urishadi. Keyin boyaqish yigitni 3-qavatga olib chiqishadi. Natijada yuqori qavatdagi xonada X.Egamberdiyev qo‘llari bilan uning qorin, bosh va peshona sohalariga zarba beradi. J.To‘rayev esa ikki-uchta ish jurnallarini birlashtirib, “Ifora” xizmatchisining peshonasiga ura boshlaydi. Bu ham yetmagandek, yerga o‘tirgan holda oyoqlarini cho‘zib, qo‘llarini boshining orqasiga qo‘yishni buyuradi. Binobarin, Doniyor ketma-ket berilgan kaltak va zarbalar og‘rig‘iga chidolmay qoladi. Iltimos, kechirim so‘rashga tushadi.

Lekin oddiy fuqaroning e’tirozini qabul qilishni o‘rganmagan xodimlarga iltimosu yalinishlar kor qilmasdi o‘sha damda. Aksincha, shundan keyin Jamoliddin va Xolmurod Doniyorni kurakda turmaydigan so‘zlar bilan haqorat qilishadi. Eng achinarlisi, to‘g‘ri gapni gapirib baloga qolgan yigitni «Hali sen shoshmay tur, «G‘urumsaroy»da yuz bergan qotillikni bo‘yningga ilib qo‘yamiz», deb qo‘rqitishadi.

So‘ng katta tezkor vakillar hudud profilaktika inspektori Nazirjon Halimjonovni bo‘limga chaqirtirib, niqobsiz yurgani uchun D.G‘oipovga nisbatan ma’muriy bayonnoma rasmiylashtirishni buyurishadi. Natijada N.Halimjonov Doniyorni IIBdan olib chiqib, vaqtincha muzqaymoq shoxobchasiga tashlab ketadi.

Albatta, inson boshiga biror-bir tashvish tushsa, birinchi galda yaqinlari, jigarlariga suyanadi. Shu ma’noda aytganda, Doniyor ham darhol akasi Dilmurod G‘oipovga qo‘ng‘iroq qilib, bo‘lgan voqeani ipidan-ignasiga so‘zlab beradi. Bunday nohaqlikka toqat qilolmagan Dilmurod esa o‘sha zahotiyoq Pop tuman prokuraturasiga ariza bilan murojaat qiladi. Doniyor tuman prokuraturasi tashqarisida turgan vaqtida bo‘lsa, profilaktika inspektori kelib, unga nisbatan O‘zbekiston Respublikasi Ma’muriy javobgarlik to‘g‘risidagi kodeksining 54-moddasi 2-qismi bilan ma’muriy bayonnoma rasmiylashtiradi. Ammo Doniyorning ahvoli yomonlashib, tuman markaziy shifoxonasiga tushib qoladi.

Shundan so‘ng mazkur holat yuzasida surishtiruv ishlari olib borilib, «qonun himoyachilari»ga nisbatan jinoyat ishlari qo‘zg‘atiladi. Uddaburonlikni qarangki, o‘z qilmishining oqibatini yaxshi bilgan aybdorlar surishtiruv-tergov jarayonlarida jabrlanuvchiga moddiy va ma’naviy zarar hisobida 10.000.000 so‘m naqd pul berishadi.
Kezi kelganda shuni alohida ta’kidlash lozimki, o‘z jinoyati tufayli o‘zgalarga zarar yetkazgan har qanday shaxs keltirgan zararining o‘rnini qoplashi shart. Biroq bu aybdorning jazodan ozod qilmaydi.

Binobarin, ayni ish ham jinoyat ishlari bo‘yicha Pop tuman sudida ko‘rib chiqildi. Sud ikkala tezkor vakilni ham Jinoyat kodeksi 206-moddasining 1-qismi, 234-moddasining 1-qismi bilan aybdor deb topdi. Natijada ularni 3 (uch) yil muddatga ichki ishlar organlari tizimida ishlash huquqidan mahrum qilib, bazaviy hisoblash miqdorining yigirma baravari miqdorida jarima jazosi tayinladi.

Xurshid Sultonov

Manba: rost24.uz