Namangan viloyatining 2025 yildagi byudjeti tasdiqlandi

Xalq deputatlari Namangan viloyati Kengashining yettinchi chaqiriq navbatdagi to‘rtinchi sessiyasida senatorlar, deputatlar, moliya va soliq idoralari rahbarlari ishtirokida viloyat byudjeti parametrlari ko‘rib chiqildi.

Namangan viloyati mahalliy byudjetining 2024 yildagi ijrosi hamda 2025 yilga mo‘ljallangan loyihalari to‘g‘risida viloyat iqtisodiyot va moliya bosh boshqarmasi boshlig‘ining o‘rinbosari Muzaffar Abdullayevning axboroti tinglandi.

Qayd etilganidek, Namangan viloyati bo‘yicha byudjet daromadlari 2024 yil prognoz ko‘rsatkichlari 4 trillion 3 milliard so‘m miqdorida belgilangan bo‘lib, haqiqatda 4 trillion 163 milliard so‘mga yoki 104 foizga bajarilib, byudjetga qo‘shimcha ravishda 160,0 milliard so‘m tushum ta’minlandi. Mahalliy byudjet daromadlariga 3 trillion 266 milliard so‘mga prognoz ko‘rsatkichlari belgilangan bo‘lib, amalda 3 trillion 429 milliard so‘mga yoki 105 foizga ijro etilmoqda.

“2025 yil uchun O‘zbekiston Respublikasining Davlat byudjeti to‘g‘risida”gi Qonunga asosan Namangan viloyati mahalliy byudjetining 2025 yil uchun daromadlari 3 trillion 942,8 milliard so‘m, xarajatlari esa 6 trillion 171,2 milliard so‘m miqdorida prognoz qilinmoqda. Respublika byudjetidan ajratiladigan tartibga soluvchi byudjetlararo transfertlar 2 trillion 228 milliard so‘m miqdorida belgilanmoqda.

2025 yil – “Atrof-muhitni asrash va “yashil” iqtisodiyot yili”da Namangan viloyatining ta’lim maskanlari, tibbiyot muassasalari ob’ektlarini loyihalashtirish, qurilish va rekonstruksiya qilish, mukammal ta’mirlash va jihozlash, ekologiya va atrof-muhitni muhofaza qilish, shuningdek, sug‘oriladigan yerlarning meliorativ holatini yaxshilashga doir xarajatlar viloyat mahalliy byudjetidan moliyalashtiriladi.

Viloyat byudjeti umumiy xarajatlarining 67,9 foizi, ya’ni 4 trillion 189 milliard 600 million so‘mni ijtimoiy soha va aholini ijtimoiy qo‘llab-quvvatlash maqsadlariga yo‘naltirish rejalashtirilgan. Ijtimoiy xarajatlarning aksar qismi ta’lim va sog‘liqni saqlash sohalariga yo‘naltirilishi kutilmoqda.

Jumladan, maktabgacha ta’lim yo‘nalishiga 345,1 milliard so‘m yoki 2024 yilga nisbatan 111 foiz, ta’lim sohasiga 608,4 milliard so‘m yoki 106 foiz, tibbiyotga 2 trillion 709 milliard 200 million so‘m yoki 119 foiz ko‘p rejalashtirilmoqda.

Prezidentimiz tashabbusi bilan joriy etilgan “Tashabbusli byudjet” dasturi platformasida fuqarolar tomonidan ilgari surilgan loyihalarni tanlab olish bo‘yicha ovoz berish yakunlariga ko‘ra, Namangan viloyatidan 387 ta loyiha g‘olib, deb topilib, ularda ilgari surilgan xayrli maqsadlarni amalga oshirish uchun 451,1 milliard so‘m ajratildi. Bu ishlar 2025 yilda ham davom ettirilib, “Fuqarolar tashabbusi” jamg‘armasi hisobidan 494 milliard so‘m yo‘naltirish kutilmoqda.

Sessiya ishida, xalq deputatlari viloyat Kengashining “Namangan viloyatining 2025 yilgi mahalliy byudjetini tasdiqlash to‘g‘risida”gi tegishli qarori qabul qilindi.

Sessiyada qatnashgan Namangan viloyat hokimi, xalq deputatlari viloyat kengashi deputati Shavkat Abdurazzoqov davlat tomonidan ajratiladigan mablag‘lardan maqsadli va oqilona foydalanish, byudjet intizomiga rioya etilishi ustidan nazorat hamda mas’uliyatni yanada kuchaytirish zarurligini ta’kidladi.