Pokiston va Afg‘oniston urush yoqasida

Tomonlar bir haftadan ko‘proq vaqt davomida chegarada zarbalar almashishmoqda. 24-dekabr kuni Pokistonning Afg‘oniston sharqidagi havo hujumlarida kamida 46 kishi halok bo‘ldi. Pokistonning aytishicha, hujumlar Pokiston Tolibonining “terrorchilar boshpanalari”ni nishonga olgan. Afg‘oniston rasmiylariga ko‘ra, qurbon bo‘lgan 46 kishining aksariyati ayollar va bolalardir.

Bunga javoban afg‘on toliblari chegaraga harbiy texnika va 15 ming askarni joylashtirdi (Britaniya OAVlariga ko‘ra). Shundan so‘ng afg‘onlar bahsli chegarada Pokistonning “bir nechta” pozisiyalariga hujum qilib, yo‘q qildi. U yerda to‘qnashuvlar davom etmoqda.

Tolibon vakillari Britaniyaning Telegraph gazetasiga bergan intervyusida mojaroning har qanday keskinlashuviga tayyor ekanliklarini aytdilar:

"Ularda yadro bombasi bormi, bizni qiziqtirmaydi - biz ishonamiz va Xudo biz bilan ekanini bilamiz", dedi yuqori martabali toliblardan biri.

Pokiston rahbarlari ham tan olishni istamaydi. Hukumat afg‘on toliblarini pokistonlik jangarilarga boshpana berganlikda ayblaydi. Gap birinchi navbatda afg‘on toliblari, ba’zi manbalarga ko‘ra, qurol-yarog‘ bilan ta’minlagan “Tehrik-e Tolibon Pokiston” (TTP) guruhi haqida bormoqda. TTP Pokistonda vayronagarchiliklar keltirib chiqarmoqda. Birgina 2024 yilda Pokiston xavfsizlik kuchlariga 444 ta hujum uyushtirilgan, kamida 685 kishi halok bo‘lgan.

BMT Xavfsizlik Kengashining so‘nggi hisobotiga ko‘ra, Afg‘onistonda 6500 ga yaqin TTP jangarisi yashiringan. “Tolibon TTPni terrorchi guruh deb hisoblamaydi”, — deyiladi xabarda. Hokimiyatni qo‘lga kiritgach, jangarilarni qamoqdan ozod qilishdi.