Moskva maktablarida ikki haftalik ta’til e’lon qilindi

Moskvada maktab o‘quvchilari 5 oktyabrdan 18 oktyabrga qadar ikki haftalik kuzgi ta’tilga chiqadi. Moskva meri Sergey Sobyanin COVID-19 bilan kasallanish ko‘paygani sabab shunday qaror qabul qilgan.

Odatda Moskva maktablarida kuzgi ta’til bir hafta davom etar edi.

“Sanitariya shifokorlari tavsiyasiga binoan, kuzgi shamollash kasalliklari va aniqlangan kovid bilan kasallanishning o‘sishini inobatga olgan holda men kuzgi ta’til davomiyligini oshirishga qaror qildim”, - deya yozgan Sobyanin.

Ta’til vaqtida masofaviy darslar bo‘lmaydi. Qo‘shimcha ta’lim muassasalari faoliyatini vaqtincha to‘xtatadi. Bog‘chalar esa odatdagidek ishlaydi.

28 sentyabrdan Moskvada 65 yoshdan kattalar uchun yana o‘zini o‘zi yakkalash rejimi amal qilmoqda. Moskvada 287 mingdan ziyod koronavirus bilan kasallanish aniqlangan. 27 sentyabr kuni ilk bor 2 iyundan buyon bir sutkada 2 mingdan ziyod kasallanish qayd etildi.