Misr prezidenti harbiylarni Liviyaga hujum qilishga chaqirdi

Misr rahbarining ta’kidlashicha, Qohiraning boshqa davlatlar tomonidan qo‘llab-quvvatlanayotgan «to‘g‘ridan-to‘g‘ri xavf» va «terrorchi jangarilar va yollanma qotillardan» himoyalanishga haqi bor va u bunga majbur.

«Chegaralarimiz ichida yoki zarurat tug‘ilgan chegara ortida ham har qanday vazifani bajarishga tayyor turing», — deydi as-Sisi harbiylarga murojaat qilib.

Avvalroq Misr Liviyada urushni to‘xtatish tashabbusi bilan chiqib, saylangan boshqaruv kengashini tuzish taklifini bildirgandi.

Ma’lumotlarga ko‘ra, Misr parlamenti prezident Abdulfattoh as-Sisining Liviyadagi mojarolarga aralashish to‘g‘risdagi har qanday so‘rovini qo‘llab-quvvatlashga tayyor.

«Agarda shunday so‘rov yuboriladigan bo‘lsa, parlament uni zudlik bilan ko‘rib chiqadi va qo‘llab-quvvatlaydi», — deydi parlamentning Mudofaa va milliy xavfsizlik masalalari bo‘yicha qo‘mitasi a’zosi general mayor Yahyo al-Kidvaniy. Uning so‘zlariga ko‘ra, mintaqa «hamma uchun istalmagan oqibatlarga olib keladigan bosqichda» turibdi. «Mazkur bayonot — qo‘shni Liviyaning xavfsizligiga putur yetkazmoqchi bo‘lganlar uchun. Misr o‘zining milliy xavfsizligiga putur yetakazadigan xavfni qo‘l qovushtirib tomosha qilib o‘tirmaydi. Misrning tashqi xavflardan o‘zini himoya qila olish imkoniyati bor. Biz harakatsiz o‘tirmaymiz va har qanday tahdidga qarshi tayyor turamiz, bu bizning qonuniy huquqimiz», — deydi parlament a’zosi.

Eslatib o‘tamiz, Liviyada uzoq vaqtdan beri ikkita ijro hukumati parallel ravishda faoliyat ko‘rsatmoqda: BMT tomonidan tan olingan va Tripolida joylashgan milliy kelishuv hukumati hamda Xalifa Xaftarning Liviya milliy armiyasi tomonidan qo‘llab-quvvatlanuvchi mamlakat sharqida joylashgan Abudlla Abdurahmon at-Tanining vaqtinchalik mahkamasi.