Messi «Real»da Ronalduning o‘rnini bosishi mumkin bo‘lgan yagona futbolchi, ammo...
«Real» prezidenti Florentino Peres Krishtianu Ronaldu ketganidan keyin jamoaga yangi hujumkor futbolchi kerak ekanini ta’kidlagandi. «Soccer.ru» sayti Madrid jamoasiga qaysi futbolchilar foyda keltirishi mumkinligi haqidagi maqolani chop etdi.
Ronalduning transferi kutilmagan bo‘ldi. «Real»ning siyosati o‘zgardimi yoki Florentino Peresning qarashlarimi? Boisi, shu paytgacha Madrid klubi yulduz futbolchilarni tarkibga jalb qilish bilan shug‘ullangandi. Figu, Zidan, Ronaldo, Kaka va Krishtianularning transferlari fikrimizning isboti. Peres yulduz futbolchilardan qachonki ularning foydasi tegmay qolganida yoki jamoada boshqa yetakchi paydo bo‘la boshlaganidagina voz kechgan. Bu safar esa hammasi boshqacha. Ronaldu hamon eng kuchli futbolchilardan biri, hamon gollar urmoqda, qolaversa, «qirollik klubi» tarkibida uning o‘rnini bosa oladigan futbolchi hali yo‘q edi. Shu holatda Peres portugaliyalik yulduzni ikkilanmay sotib yubordi.
Bundan tashqari, «Real» prezidenti birinchi bor yozgi transferda yirik xaridni amalga oshirmadi. Pogba, Neymar va Mbappelarning xarid qilinishi mumkinligi borasida gap-so‘zlar tarqaldi, biroq yakunda Peres hech kimni sotib olmadi. Ehtimol, bundan buyon rejalar o‘zgarar?..
Robert Levandovski («Bavariya»; Polsha)
Levandovski butun boshli karyerasini Bundesligada o‘tkazmoqchi emas, Peres esa bir necha yil oldin unga shartnoma taklif qilgandi. Sababi, Chempionlar ligasining avvalgi mavsumlaridan birida Levandovski «Borussiya» safida o‘ynab, «Real» darvozasiga naq 4 ta gol kiritgan, o‘shandan buyon Peresning qalbida polshalik hujumchiga nisbatan «muhabbat» paydo bo‘lgandi. Shu bilan birga Ronaldu chap qanot hujumida o‘ynaydi. «Real» esa Raul, Ronaldo va van Nistelroy ketganidan keyin markaziy hujumchiga yolchimay kelyapti. To‘g‘ri, Levandovski mundialda yaxshi ishtirok eta olmadi, ammo bu uning iqtidorli futbolchi ekanligiga soya sola olmaydi.
Mauro Ikardi («Inter»; Argentina)
Ikardi jahon chempionatida umuman ishtirok etmadi va bu bevosita Argentina terma jamoasi yetakchisi Lionel Messi bilan bog‘liq. Messi Ikardining mundialda ishtirok etishini istamadi va yakunda chindan ham shunday bo‘ldi. Ammo Messi Ikardining La Ligada o‘ynashiga to‘sqinlik qila olmaydi. Umuman, Mauroning «Real»da to‘p surishiga hech qanday to‘siq yo‘q, agar Peres uni sotib olishga jiddiy qaror qilsa, Ikardi shu zahoti «Real» libosini kiyadi. Biroq ayni damda «qirollik klubi» Ikardiga asosiy emas, zaxira variant sifatida qaramoqda.
Paulo Dibala («Yuventus»; Argentina)
Dibala — yosh va iqtidorli futbolchi. U «Yuventus»da butun boshli tizimning bir qismi. «Real»da esa u shaxsiy sifatlarini ko‘rsatish va superyulduzga aylanish imkoniga ega. Biroq ayni damda Krishtianu Ronalduning «Yuventus»ga o‘tgani Dibalani Turinda qolishga undashi mumkin. Chunki futbolchining ko‘nglida jamoasining imkoniyatiga bo‘lgan ishonch ortgan bo‘lishi ehtimoldan holi emas. Ammo hammasi Peresga bog‘liq, agar u Ronalduning sotilgani evaziga «Yuventus»dan Dibalani transferga qo‘yishni so‘rasa, vaziyat o‘zgaradi.
Eden Azar («Chelsi»; Belgiya)
Azarning «Real»ga o‘tishi mumkinligida hech qanday muammo yo‘q. Bu borada hammasi «Real»ning qo‘lida. Peres «Chelsi» rahbariyati bilan bafurja gaplashib olsa, olam guliston. Shuningdek, Florentino Peres «Real»ga aynan Azar kerakligiga ishonmoqda.
Antuan Grizmann («Atletiko»; Fransiya)
Imkonsiz. Hech qanday yo‘li yo‘q! To‘g‘ri, bu futbolchi «Real» uchun juda mos. Ammo unutmaslik kerakki, Grizmann yaqinda «Barselona» taklifini rad etdi. Boshqa jamoaga o‘tmoqchi bo‘lgani uchun emas, shunchaki u Madridda hamma narsadan mamnun, «matraschilar» rahbariyati va muxlislari uni qadrlashadi. Qolaversa, Antuan o‘ta adolatli va samimiy inson. Sadoqatli futbolchi. Shundan kelib chiqib Grizmanning «Real»ga o‘tishini imkonsiz ish deyish mumkin. Ammo...
Xarri Keyn («Tottenxem»; Angliya)
«Real»ning hujum chizig‘ini kuchaytirishi mumkin bo‘lgan futbolchi aynan Keyndir. Chunki u ayni damda Levandovski kabi hujumchilardan ham va tabiiyki Benzemadan ham yaxshi harakat qilmoqda. Bundan tashqari, Beyl bilan Keynning maydondagi hamkorligi ajoyib kechadi: bir tilda suhbatlashadigan ikkita futbolchi maydonda fikrlarini bir-biriga bemalol yetakaza oladi, masalan, Beyl maydondagi holatini o‘zgartirishni istab qolsa, buni Keyn bilan juda yaxshi uddalaydi. Garchi «Tottenxem» rahbariyati Keynning sotilmasligini ta’kidalagan bo‘lsa-da, Peres «shporlar»dan futbolchi sotib olish bo‘yicha yaxshi tajribaga ega — Beyl 5 yil, Modrich esa 6 yildan beri Madridda.
Muhammad Saloh («Liverpul»; Yegipet)
Misrlik futbolchi o‘tgan mavsumda APLga keldi va aql bovar qilmas natijalarni ko‘rsatdi, iqtidori qay darajada ekanini namoyon qildi. U bu iqtidori bilan tezlik va raqobat kamroq bo‘lgan Ispaniyada APLdagidan ko‘proq gol urishi mumkin. Ammo shuni ham ta’kidlash kerakki, Muhammad Saloh 25 yoshida juda tez yulduzga aylandi. Ehtimol, bu vaqtinchalik holatdir, yana kim bilsin?
Kilian Mbappe (PSJ; Fransiya)
19 yoshli futbolchi jahon chempioniga aylanib ulgurdi. Qolaversa, Mbappeda yaqin vaqt ichida dunyo futboli yulduziga aylanish imkoni mavjud. Tabiiyki, «Real» ham Mbappeni sotib olishni istaydi. Ammo fransiyalik yosh iqtidor egasi «PSJ»dan hech qayerga ketmasligini ta’kidladi. Parij klubi esa uning sotilishiga kichkinagina bo‘lsa ham imkon qoldirmasligini ma’lum qildi. «Pari Sen-Jermen» tushunib turibdi, bunday olmosni hech qanday katta pulga ham sotib bo‘lmaydi.
Neymar (PSJ; Braziliya)
Neymar — «PSJ» sotishni istamayotgan, ammo «Real» jiddiy qiziqayotgan yana bir futbolchi. Braziliyalik charm to‘p ustasi «Barselona»dan dahshatli summa evaziga ketgach, yana Ispaniyaga qaytishni xohlab qoldi, faqat bu safar «Real» safiga. Ammo o‘shanda «PSJ» Neymarni sotmagandi. Ammo endi vaziyat boshqacha. Agar Parij klubi jamoa o‘yinini Kilian Mbappe atrofida qurishni afzal ko‘rsa, xarakteri juda og‘ir bo‘lgan Neymardan qutulish haqida o‘ylab qolishi mumkin.
Lionel Messi («Barselona»; Argentina)
Chin ma’noda Lionel Messi bugun Ronalduning o‘rnini bosishi mumkin bo‘lgan yagona futbolchi. Messi ayni shu jihat tufayli ham mazkur ro‘yxatga kiritildi. Biroq futbolda hamma narsa bo‘lishi mumkin. Messining tovon puli 700 mln yevro, deysizmi? Unutmang, yaqin-yaqingacha Ronalduning tovon puli 1 milliard yevro edi, ammo uni «Real» 100 mln yevrodan oshiqroq summaga sotib yubordi. Ko‘ramiz, yana nimalar bo‘larkin?
Manba: soccer.ru
