Mehmonxonada saqlangan og‘ular fosh bo‘ldi

Bugungi kunda kuchli ta’sir qiluvchi moddalar savdosining yoshlar va kattalar orasida tobora kengayib borishi nafaqat jinoyat, balki ijtimoiy muammo sifatida jamiyatni chuqur xavotirga solmoqda. Kuchli ta’sir qiluvchi moddalarning noqonuniy aylanmasi yoshlarning kelajagiga salbiy ta’sir ko‘rsatib, ularni sog‘lom hayotdan uzoqlashtirmoqda.

So‘nggi yillarda kuchli ta’sir qiluvchi moddalar noqonuniy aylanmasi yoshlar orasida tobora ommalashib, tezkor tadbirlar natijasida ko‘plab yoshlar noqonuniy savdoda ishtirok etgani fosh etilmoqda.

Yoshlar hayotidagi qiyinchiliklar, moliyaviy muammolar, oilaviy va ijtimoiy bosimlar ularni giyohvandlik va noqonuniy savdo yo‘liga kirib qolishiga olib kelmoqda. Shu bois, bu illatni faqat qonuniy choralar bilan emas, balki ijtimoiy, psixologik va ta’lim sohasidagi integrasiyalashgan yondashuvlar orqali hal qilish zarurati ortmoqda.

Huquqni muhofaza qiluvchi organ xodimlari tomonidan poytaxtda o‘tkazilgan tezkor tadbir davomida 1988 yilda tug‘ilgan N.Usmonova va 2000 yilda tug‘ilgan D. Zaripovalar (ism-shariflar o‘zgartirilgan) noqonuniy psixotrop moddalar savdosi bilan shug‘ullanayotgani aniqlangan. Ular “Pregabalin” moddasidan tayyorlangan 14 dona “Regapen” kapsulalari hamda 0,1 gramm “Tropikamid” suyuqligini 100 AQSh dollari va 100 ming so‘m evaziga sotayotgan vaqtida qo‘lga olingan.

Mehmonxona xonasi ko‘zdan kechirilganida, 14 dona “Regapen” kapsulalari va 3 dona “Tropikamid” flakonlari topilgan. Bu moddalarning kelgusida sotish uchun saqlanayotgani aniqlangan. Bundan tashqari, D.Usmonovadan a-RVR moddasining borligi aniqlanib, u ham rasmiylashtirilgan.

Sud, ushbu jinoyat ishi yuzasidan to‘plangan ish hujjatlarini tekshirib chiqib, guvohlarning ko‘rsatuvlariga, sud majlisida aniqlangan holatlar hamda tergov materiallarini sinchkovlik bilan, to‘la, har tomonlama va xolisona tekshirib chiqib, sudlanuvchilarning ayblari bildirgi, tushuntirish xatlari, foto suratlar, narkologiya markazining dalolatnomalari hamda jinoyat ishidagi boshqa ob’ektiv dalillar bilan to‘liq isbotini topgan deb hisobladi.

Sud N. Usmonova hamda D. Zaripovani Jinoyat kodeksi 251-1-moddasining 2-qismida ( giyohvandlik vositalari, ularning analoglari yoki psixotrop moddalar hisoblanmaydigan kuchli ta’sir qiluvchi moddalarni targ‘ib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish)nazarda tutilgan jinoyatni sodir etganlikda aybli deb topib, 75-moddani qo‘llab, 4 yil muddatga ozodlikni cheklash jazosi tayinladi.

Ha ikkala sudlanuvchiga politoksikomaniya (pregabalin, tropikamid)dan umumiy asosda tibbiy muassasalarda davolanish choralari ko‘rish belgilandi.

Bu voqea — yoshlar orasidagi psixotrop moddalar savdosining jiddiy tahdid ekanligini yana bir bor ko‘rsatdi. Har bir inson hayoti qadrlidir va bunday jinoyatlarga qarshi kurash har birimizning jamiyat oldidagi mas’uliyatimiz ekanligini yana bir isbotidir.

Yoshlarimiz o‘rtasida psixotrop moddalar savdosining kengayishi — jiddiy ijtimoiy muammo bo‘lib, unga qarshi samarali va ko‘p qirrali kurash zarur. Har bir insonning hayoti, sog‘ligi va kelajagi biz uchun bebaho. Shu bois, jamiyatning har bir bo‘g‘ini — ota-onalar, ta’lim muassasalari, huquq-tartibot organlari va nodavlat tashkilotlar birgalikda faol kurash olib borishi shart.

Faqatgina shunday keng qamrovli yondashuv orqali jamiyatimizni giyohvandlik tahdididan asrash va yoshlarimizning kelajagini nurli qilish mumkin.