Livandagi gumanitar inqirozni bartaraf etish uchun 400 mln dollardan ortiq mablag‘ zarur

BMTning gumanitar masalalarni muvofiqlashtirish boshqarmasi vakili Yens Lerkning ma’lum qilishicha,sentyabr oyi o‘rtalarida Livanda sodir bo‘lgan nizolar va zo‘ravonliklar oqibatida kamida 1000 kishi halok bo‘lgan va yana 6000 dan ortiq kishi yaralangan.

Voqealar jarayonida bir qancha infratuzilmalar vayron bo‘lib, aholi oziq-ovqat va tibbiy vositalarga bo‘lgan ehtiyojini qondirishda jiddiy qiyinchiliklarga duch kelyapti.

BMT ma’lumotiga ko‘ra, vaziyatni barqarorlashtirish va aholining gumanitar ehtiyojlarini qondirish uchun 400 million dollardan ortiq mablag‘ zarur. Bu yordam birinchi navbatda oziq-ovqat, suv, tibbiy vositalar va boshpanalar bilan ta’minlashga qaratilgan. Bundan tashqari, qurolli to‘qnashuvlar oqibatida vayron bo‘lgan infratuzilmalarni tiklash va yangidan qurish uchun ham qo‘shimcha yordam kerak.

BMT va boshqa xalqaro tashkilotlar hukumatlarni Livanga yordam ko‘rsatishda faol qatnashishga chaqirar ekan, hozirda mamlakatdagi gumanitar inqirozning oldini olish uchun tezkor va samarali harakatlar zarurligi ta’kidlanyapti.