Kiyevda YEI davlatlari TIV rahbarlari Ukrainani qo‘llab-quvvatlashga va’da berdi
Jozep Borrel Yevropa Ittifoqi tashqi ishlar vazirlarining Kiyevdagi norasmiy uchrashuvi maqsadini «Ukraina xalqini birdamlik va qo‘llab-quvvatlash ifodasi» deb atadi. Yig‘ilishda Ukrainaning Yevropa Ittifoqiga qo‘shilishi masalasi ko‘tarildi.
2 oktyabr, dushanba kuni Kiyevda bo‘lib o‘tgan norasmiy yig‘ilishda ishtirok etgan Yevropa Ittifoqining 27 davlatidan 24 tasi tashqi ishlar vaziri Ukrainani uzoq muddatli qo‘llab-quvvatlashiga ishontirib, uning YEIga a’zo bo‘lish istiqbollarini tasdiqladi. Yevropa diplomatiyasi rahbari Jozep Borrel tashrif maqsadini «Ukraina xalqini birdamlik va qo‘llab-quvvatlash ifodasi» deb atadi.
Shu bilan birga, Borrel Yevropa Ittifoqi mamlakatlari hukumatlariga kelasi yili Kiyevga 5 milliard yevrogacha harbiy yordam ajratishni taklif etdi. U Yevropa va Ukraina mudofaa kompaniyalari o‘rtasida yaqin hamkorlikni e’lon qildi.
Zelenskiy: Ukrainaning g‘alabasi Yevropa Ittifoqi bilan hamkorlikka bog‘liq
Ukraina prezidenti Volodimir Zelenskiy Yevropa Ittifoqi Tashqi ishlar kengashining yig‘ilishi ishtirokchilariga Ukrainaning Rossiya bilan urushdagi g‘alabasi Yevropa Ittifoqi bilan hamkorlikka bog‘liqligini aytdi. «Ishonchim komilki, Ukraina va butun erkin dunyo bu qarama-qarshilikda g‘alaba qozonishga qodir. Lekin bizning g‘alabamiz bevosita siz bilan hamkorlik qilishimizga bog‘liq», - deya ta’kidladi Ukraina rahbari.
U o‘z nutqida Yevropa Ittifoqi davlatlariga Ukrainani qo‘llab-quvvatlagani uchun minnatdorchilik bildirdi va mudofaa, diplomatiya va integrasiya sohasida yangi qadamlar qo‘yish, shuningdek, Rossiyaga qarshi yangi sanksiyalar paketi ustida ishlashni kuchaytirishga chaqirdi. «Har qanday sanksiya pauzalari Rossiya tajovuzi vaqtini oshiradi, 11-sanksiya paketidan keyingi pauza cho‘zilib ketdi», dedi Volodimir Zelenskiy. «Shubhasiz, Rossiya yadro sanoatiga qarshi sanksiyalar zarur. Bu Zaporijjya atom elektr stansiyasi va Rossiyaning shubhali yadro texnologiyalaridan foydalanishiga qarshi qadam sifatida, ham xavfsizlik, ham siyosiy nuqtai nazardan kerak».
Kuleba Ukrainaning YEIga a’zoligi bo‘yicha Yevropa Ittifoqi TIV rahbarlari o‘rtasida konsensusni ko‘rmoqda
Ukraina tashqi ishlar vaziri Kuleba Yevropa Ittifoqi tashqi ishlar vazirlari yig‘ilishida Ukrainaning Yevropa Ittifoqiga a’zoligi bo‘yicha konsensusga erishilganini ma’lum qildi. «Bugungi yig‘ilish Ukrainaning YEIga a’zo bo‘lishi haqida ham bo‘ldi. Bu borada ham barcha hamfikr bo‘ldi. Yagona masala - vaqt. Hamma, Ukraina ham, Yevropa tomoni ham olg‘a intilishda qat’iy. Bu - Ukraina tomonidan amalga oshirilgan barcha islohotlarni inobatga olgan holda maksimal tezlikda amalga oshirilmoqda va amalga oshiriladi», dedi Kuleba. U Yevrokomissiyaning ushbu jarayonni boshlash bo‘yicha barcha yetti tavsiyasi amalga oshirilishiga va’da berdi.
Juma kuni Ispaniyaning Granada shahrida Yevropa Ittifoqi sammiti bo‘lib o‘tadi, unda Kiyevning yil oxirigacha Ukraina YEIga kirishi bo‘yicha muzokaralarni boshlash haqidagi iltimosi muhokama qilinadi. Yevrokomissiya noyabr oyining boshidan kechiktirmay tegishli tavsiyanoma tayyorlash niyatida, shundan so‘ng muzokaralarni boshlash bo‘yicha yakuniy qaror dekabr oyi o‘rtalarida Bryusseldagi sammitda qabul qilinishi kerak, buning uchun Yevropa Ittifoqining barcha 27 davlati roziligi talab etiladi.
Evropa Ittifoqining uch mamlakati vazirlari Kiyevga kelmadi
Kiyevdagi yig‘ilishga Yevropa Ittifoqiga a’zo uchta davlat: Vengriya, Polsha va Latviyaning asosiy diplomatlari kelmadi, ular quyi darajada vakillik qildi. Ukraina hukumati Polsha va Latviya tashqi ishlar vazirlarining kelmaganini ularning kasalligi bilan izohladi, Vengriya TIV rahbarining kelmagani sababi aytilmadi. Ayni paytda, Budapesht Rossiyada faoliyat yuritayotgan Vengriya OTP bankini Ukrainaning «xalqaro urush homiylari» ro‘yxatidan chiqarishni talab qilayotgani va shu munosabat bilan Yevropa Ittifoqining Kiyevga yuzlab million yevrolik harbiy yordam paketini bloklagani avvalroq xabar qilingan edi.
Bundan tashqari, Ukraina va uning Sharqiy Yevropadagi ba’zi asosiy tarafdorlari, xususan, Polsha o‘rtasida Ukraina g‘allasini bu mamlakatlarga import qilish bo‘yicha keskinlik bor.
