JCH-2026: AQShdagi mehmonxonalar narxi keskin arzonlashmoqda. Bunga nima sabab bo‘ldi?

Joriy yil AQSh mezbonlik qiladigan Jahon chempionati arafasida mamlakatdagi mehmonxona narxlari keskin pasayib ketdi. Bu haqda soha vakillariga tayanib, Financial Times nashri xabar bermoqda. Narxlarning tushishiga chiptalar narxi haddan tashqari qimmatligi hamda dunyoda AQShga nisbatan shakllangan salbiy kayfiyat tufayli muxlislar tashrifining kamayishi xavfi sabab bo‘lmoqda.

Avvalroq Yevropa futbol muxlislari assosiasiyasi (FSE) chiptalar narxini “talonchilik” deb atagan va ularning savdosini darhol to‘xtatishga chaqirgandi. Ma’lumotlarga ko‘ra, FSE va Yevropa iste’molchilar huquqlarini himoya qilish guruhi chiptalar savdosidagi monopoliya yuzasidan Yevrokomissiyaga FIFA ustidan shikoyat kiritgan.

“AQSh mehmonxonalari yozda bo‘ladigan Jahon chempionati davri uchun narxlarni tushirishga majbur bo‘lmoqda. Soha rahbarlarining ogohlantirishicha, chiptalarning qimmatligi, inflyasiya xavfi va antiamerika kayfiyati muxlislarni sayohat rejalaridan voz kechishga majbur qilmoqda”, deyiladi nashr materialida.

Lighthouse Intelligence tahliliy kompaniyasi ma’lumotlariga ko‘ra, musobaqaga mezbonlik qiluvchi Atlanta, Dallas, Mayami, Filadelfiya va San-Fransisko kabi shaharlarda mehmonxona narxlari yil boshidagiga nisbatan uchdan bir qismga (taxminan 30 foizga) arzonlagan.

Soha mutaxassislaridan biri xalqaro talabning pasayishini AQShning viza va immigrasiya siyosatidan norozilik, shuningdek, Eron atrofidagi beqaror vaziyat bilan izohladi. Ma’lum bo‘lishicha, turnirni boykot qilish haqidagi chaqiriqlardan so‘ng, bir kechaning o‘zida 17 mingga yaqin ishqiboz o‘z chiptalarini qaytarib bergan.

“Odamlarning AQShga kelish istagi sezilarli darajada kamaygani yaqqol ko‘rinib turibdi”, deya qo‘shimcha qiladi Financial Times.

Eslatib o‘tamiz, JCH—2026 ilk bor 48 ta jamoa ishtirokida uch mamlakat — AQSH, Meksika va Kanada maydonlarida o‘tkaziladi. Turnir 11 iyundan 19 iyulga qadar davom etadi. Shuningdek, 2028-yilda Los-Anjeles shahri yozgi Olimpiada o‘yinlariga mezbonlik qilishi rejalashtirilgan.