Javohir Sindorov: “Jahon kubogi — hayotimdagi eng ajoyib lahzalardan biri bo‘ldi”

Shaxmat bo‘yicha 2025 yilgi Jahon kubogi g‘olibi, 19 yoshli o‘zbekistonlik grossmeyster Javohir Sindorov Xalqaro shaxmat federasiyasi (FIDE) rasmiy sahifasiga intervyu berdi. Sportchi unda musobaqaning hal qiluvchi pallasidagi hissiyotlari va finalga tayyorgarligi haqida gapirdi.

Sindorov Jahon kubogidagi g‘alabasini shaxmatdagi faoliyati uchun eng muhim voqealardan biri sifatida baholadi:

“Turnir juda uzoq va og‘ir o‘tdi. Chempionlikni qo‘lga kiritganimdan xursandman. Bu men uchun hayotimdagi eng ajoyib lahzalardan biri bo‘ldi. Jahon kubogi — hozirgacha yutgan eng nufuzli musobaqam. Shuningdek, Nomzodlar turniriga yo‘llanma olganimdan juda baxtiyorman. Hali o‘z ustimda ko‘p ishlashim kerak, mening shaxmatdagi yo‘lim endi boshlanmoqda”.

Uning navbatdagi asosiy maqsadlaridan biri — reytingini 2750 ga yetkazish va dunyoning eng kuchli sakkiz shaxmatchisi qatoriga kirish.

“Murabbiyim har doim 2750 reyting ball olishim, keyin eng kuchli sakkizlikka kirishim kerakligini eslatadi. Buning uchun ishlash, ishlash va yana ishlash zarur. Ikki-uch kun dam olaman, keyin fevralgacha ketma-ket turnirlarda qatnashaman. Shundan so‘ng nomzodlar turniriga tayyorgarlik boshlanadi”, deydi u.

Sindorov chempionlikdan keyin kelgan tabriklar haqida ham so‘z yuritdi.

“Juda ko‘p tabriklar oldim. Barchasi men uchun qadrli. Ammo Prezidentimizning e’tibori meni alohida baxtli qildi. Hissiyotlarimni so‘z bilan ta’riflash qiyin. Oilamning oxirgi kunlarda shu yerga kelib, meni qo‘llab-quvvatlagani ham kuch berdi. Ular ovqat, shokolad, milliy taomlarimizni olib kelishdi”, dedi grossmeyster.

U finaldagi taktika, Vey Liga qarshi tanlangan strategiya va tay-brekdagi muhim lahzalar haqida ham to‘xtaldi.

“Vey Li debyut variantlarni juda yaxshi biladi. Debyutda unga qarshi ustunlik olish qiyin. Shu sabab 5+3 yoki 2+2 kabi qisqa vaqt nazorati biz uchun qulay bo‘ladi, deb o‘yladik. Tayyorlagan qopqonlarimiz bor edi. 15+10 va 10+10 partiyalarida ishonchli o‘ynadim, chunki raqib bu vaqtda bosimiga tushib qoldi”, deydi Sindorov.

U hal qiluvchi epizod sifatida tay-brekning ikkinchi partiyasini esladi:

“Filni E7ga chiqarib, fillarni almashtirgach, vazirni H4ga qo‘yishim uning imkoniyatlarini keskin kamaytirdi. U 10 soniyada juda murakkab variantlarni topishi kerak edi — bu deyarli imkonsiz. Oxiri vaqtdan yutqazdi. Men esa taktik imkoniyatni topdim va juda xursand bo‘ldim”.

Sindorov murabbiy va hamkorlardan biri — grossmeyster Muhiddin Madaminovning rolini ham alohida tilga oldi.

“Muhiddin Madaminov bilan 2+2 va 2+1 formatida juda ko‘p mashg‘ulotlar o‘tkazdik. U juda ayyor shaxmatchi, ikki-uch yurishli kombinasiyalarni topishda menga katta yordam berdi. Strategiyamiz rapid va blisda juda yaxshi ishladi”, dedi 19 yoshli grosmeyster.

Suhbat yakunida Javohir yaqin kelajakdagi rejalari haqida gapirdi:

“Hozir faqat dam olmoqchiman. Uch-to‘rt kun uyda hordiq chiqaraman. Keyin Janubiy Afrikaga yo‘l olaman: GCL, Yevropadagi turnirlar, Veyk-an-Zee, Tata Steel Chess India, rapid va blis bo‘yicha Jahon chempionati — dam olishga vaqt bo‘lmaydi. Kelasi turnirlarda ham yaxshi natija ko‘rsatishga harakat qilaman. Hammaga rahmat”.

Ma’lumot uchun, Javohir Sindorov bundan avval 2022 yil Hindistonning Chennay shahrida o‘tgan Butunjahon shaxmat olimpiadasida O‘zbekiston terma jamoasi tarkibida g‘oliblikni qo‘lga kiritgan.