FIDE reytingi yangilandi. Nodirbek Abdusattorov o‘z o‘rnida qoldi, Javohir Sindorov esa bir pog‘ona yuqoriladi

Jahon shaxmat federasiyasi (FIDE) yanvar oyi yakuni bo‘yicha yangilangan reytingni e’lon qildi. Kuchli 100 talik ro‘yxatda O‘zbekistondan 5 nafar grossmeyster o‘rin oldi.

Reytingda norvegiyalik Magnus Karlsen 2840 ochko bilan yetakchilik qilmoqda. Ikkinchi pog‘onadan amerikalik Hikaru Nakamura joy oldi (2810). Kuchli uchlikni esa yana bir AQSh vakili Fabiano Karuana (2795) yakunladi. Top-10 reytingdan shuningdek Vinsent Keymer (2776), Arjun Erigaisi (2775), Anish Giri (2760), Alireza Firuzja (2759), Praggnananda (2758), Gukesh Dommaraju (2754) va Vei Li (2754) o‘rin olgan.

O‘zbekistonlik shaxmatchilarning egallagan o‘rni qanday?

Nodirbek Abdusattorov hamon O‘zbekistonning birinchi raqamli shaxmatchisi bo‘lib turibdi. Uning hisobida 2751 ochko bor. Abdusattorov hozirda FIDE reytingida 12-pog‘onani band etgan. Nodirbek hozirda Niderlandiyaning Veyk-an-Zee shahrida bo‘layotgan Tata Steel Chess turnirida ishtirok etmoqda. U Masters guruhi doirasidagi 12-tur bellashuvlaridan keyin 8 ochko bilan turnir jadvalining birinchi pog‘onasini band etgan. Abdusattorov ushbu musobaqadagi ishtirokini yakunlasa, FIDE reytingida 5-pog‘onaga ko‘tarilib oladi.

O‘zbekistonning ikkinchi raqamli grossmeysteri Javohir Sindorov FIDE reytingida bir pog‘ona yuqorilab, 20-o‘rindan joy oldi. Sindorov hisobidagi ochkolar soni dekabr oyiga nisbatan 3 ballga kamaygan (2726). Biroq raqiblarining yomon natijalari evaziga ko‘tarildi. Shuningdek, Javohir ham Tata Steel Chess musobaqasida muvaffaqiyatli ishtirok etmoqda. U 12-tur yakunlariga ko‘ra, 7,5 ochko bilan turnir jadvalida 2-pog‘onani band etgan. Agar ushbu musobaqa yakunlansa, 7 pog‘ona yuqorilab, 14-o‘ringa ko‘tarilib olishi ehtimoli yuqori.

Nodirbek Yoqubboyevning reytingdagi o‘rni o‘zgarishsiz qoldi. U 2691 ochko bilan 36-pog‘onani band etgan. Tajribali grossmeyster Rustam Qosimjonov 2668 ochko bilan 48-o‘rinni egallab turibdi. U o‘tgan oyda 51-o‘rinda edi. Yana bir o‘zbekistonlik shaxmatchi Shamsiddin Vohidov 2644 ochko bilan 79-o‘rinni band etgan (o‘tgan oy 85-pog‘ona edi). FIDE jamoaviy reytingiga ko‘ra, O‘zbekiston Shaxmat federasiyasi 2606 ochko bilan 12-o‘rinni egallab turibdi.

Shuningdek, FIDE ayollar top-100 reytingida ikki nafar o‘zbekistonlik shaxmatchi o‘rin olgan. 16 yoshli Afruza Hamdamova 2403 ochko evaziga 40-o‘rinni egallab turgan bo‘lsa, Gulruhbegim Tohirjonova 2363 ochko bilan 81-pog‘onani band etgan. O‘zbekiston ayollar terma jamoasi FIDE reytingida 2258 ochko bilan 15-pog‘onadan joy olgan.