Laporta — Negreyra ishi haqida: «Sudya «Real»ning yuziga eshikni yopib qo‘yganidan xursandman»

«Barselona» prezidenti Joan Laporta «Real»ni tanqid qildi, shuningdek, sudning "Qirollik klubi"ga "ko‘k-anorranglilar" moliyaviy hujjatlariga kirish huquqini bermagani haqidagi qarorini izohladi. Ushbu so‘rov «Barselona»ga Ispaniya Qirollik futbol federasiyasi (RFEF) tizimida ishlagan hakamlar texnik qo‘mitasining (CTA) sobiq vise-prezidenti Xose Mariya Enrikes Negreyraga qilingan to‘lovlar bo‘yicha pora berish ayblovlari bilan bog‘liq edi.

«Bu — normal holat emas, raqib klub haqida ma’lumot olish uchun sud jarayonidan foydalanish klub uchun mutlaqo yarashmaydigan xulq-atvor. Bu o‘rinsiz edi va sudya ham buni xuddi shunday qabul qildi. Biz allaqachon bilamiz, barchamiz bilamiz — bularning barchasi “Barsa”ni izdan chiqarish va obro‘-e’tiborimizga putur yetkazish uchun uyushtirilgan. Hukm chiqarilishidan oldinoq bizni aybdor deb atashyapti, ammo ular biz hech qanday qonunbuzarlikka yo‘l qo‘ymaganimizni ko‘rishadi. Ishonamanki, bu ish yaqin vaqt ichida yopiladi.

«Real» “Barsa”ga oid maxfiy ma’lumotlarni qo‘lga kiritishga urinib, o‘rinsiz harakatlar qilmoqda, shu sababli ularning so‘rovi asossiz edi. Bundan ham ko‘prog‘ini aytaman: bu holatda ular o‘zlari ham yolg‘on ekanini biladigan da’volarni qo‘llab-quvvatlashga, shuningdek, o‘z televideniyesida aytib kelayotgan gaplarini mustahkamlashga urinmoqda. Ular aytmoqchi bo‘layotgan narsalarni tasdiqlaydigan hech qanday dalil bo‘lmaydi. «Barsa» hech qachon hakamlardan manfaatli munosabatga erishish orqali musobaqani manipulyasiya qilishga urinmaganini allaqachon namoyish etgan. Sudya “Real”ning yuziga eshikni yopib qo‘yganidan xursandman.

Ular ishni cho‘zishga urinayotganini ko‘ryapmiz, garchi hech narsa bo‘lmaganini yaxshi bilishsa-da. Bizdan yaxshiroq bo‘lish uchun esa mehnat qilish, kurashish va hammasini to‘g‘ri bajarish kerak, bu esa doim ham ularda uddalanavermaydi», — deya Laportaning so‘zlarini keltiradi Mundo Deportivo.