Eshak go‘shti nega harom qilingan?

Savol:

Assalomu alaykum! Cho‘chqa, it, eshak go‘shti nima uchun dinimizda harom qilingan?

Javob:

Cho‘chqa, it va eshak go‘shtlari shariat egasi - Alloh taolo tomonidan harom qilingan. Bu hukmlar yo O‘zining Kalomi bilan, yo Rasulining tili bilan bayon qilingan. Shariatda halol yo harom qilish Olamlar Parvardigorining ishidir. Alloh taolo A’rof surasining 54-oyatida: Ogoh bo‘ling, yaratish va amr qilish Uning o‘ziga xosdir , deydi. Shunga o‘xshash ta’limotlar sababidan biz Alloh buyurgan amallarni eshitiboq itoat qilamiz va bu jihatimiz bilan boshqalardan farqlanamiz. Zero Haq taoloning har bir ishi hikmatlidir. Alloh taolo Fotir surasi, 14-oyatida: O‘ta xabardor zotdek hech kim senga xabar bera olmas , deydi.

Alloh o‘zi chiqargan hukmlarning ba’zilarini hikmatini bayon qilgan va ba’zilarini bayon qilmagan. Chunki Qur’oni karim hikmatlar bayoni qilinadigan kitob emas. Bizga u hukmlarni olamlarning Parvardigori chiqargani yetarlidir. Biz Alloh Baqara surasining oxirida o‘rgatganidek Eshitdik va itoat qildik. Ey Rabbimiz mag‘firatingni so‘raymiz va qaytib borish Sengadir , deymiz.

Hayot va ilm zamonlar o‘tishi bilan mazkur hayvonlarning harom bo‘lish sabab va hikmatlarini ravshan ko‘rsatib berayotgan bo‘lsa ham, biz musulmonlar aynan mazkur e’tiqodda qolaveramiz.

Vallohu a’lam.

Mubashshir Ahmad