Ertaga Qozog‘istonda prezidentlik uchun nomzod ko‘rsatish boshlanadi
Qozog‘iston prezidentligiga 20 noyabr kuni bo‘lib o‘tadigan navbatdan tashqari saylovda qatnashish uchun nomzod ko‘rsatish 23 sentyabrdan boshlanadi. Bu haqda Markaziy saylov komissiyasi raisi o‘rinbosari Konstantin Petrov ma’lum qildi.
“Qozog‘iston Respublikasi prezidentligiga nomzod ko‘rsatish saylov tayinlangan kundan, ya’ni 23 sentyabrdan boshlanadi va 11 oktyabr kuni mahalliy vaqt bilan 18.00 da to‘xtatiladi”, deyiladi xabarda.
Petrov ta’kidlaganidek, saylov natijasini aniqlash va saylangan prezidentni ro‘yxatga olish uchun yetti kundan ko‘p bo‘lmagan muddat, ya’ni 21-27 noyabr oralig‘i belgilandi.
MSK yig‘ilishida saylov oldi tashviqotni o‘tkazish bo‘yicha tegishli reja tasdiqlandi.
Komissiya kotibi Muxtor Yerman saylovni xorijiy ekspertlar kuzatib borishi muhimligini ta’kidladi. Bu jarayonni Tashqi ishlar vazirligi muvofiqlashtiradi.