Buyuk Britaniyadagi qurol-yarog‘ zavodida portlash yuz berdi

Buyuk Britaniyaning eng yirik BAE Systems mudofaa kompaniyasining Janubiy Uelsdagi zavodlaridan birida portlash sodir bo‘ldi, deya xabar beradi Kazinform agentligi BBCga tayanib.

O‘t o‘chirish va qutqaruv xizmatlari hamda tez yordam xizmatlari voqea joyiga chaqirilganini ma’lum qildi. Keyinroq shifokorlar portlashdan hech kim jabrlanmagani uchun ularning yordamiga muhtoj emasligini aytishdi.

Kompaniya Monmutshirdagi Glaskoud qishlog‘i yaqinida joylashgan. Qurol-yarog‘ zavodi yaqinida yashovchi mahalliy aholining Argus Uels yangiliklar saytiga aytishicha, portlash shunchalik kuchli bo‘lganki, hatto yer silkinib ketgan.

- Men bo‘lgan joyda, unchalik baland emas edi, lekin umuman olganda, zilzila kabi edi. Mashinam silkinib ketdi, — deya qo‘shimcha qildi u.

Kompaniya vakillari tegishli protokollarda ko‘rsatilgan barcha xavfsizlik choralarini "darhol" olganliklarini va saytdagi barcha xodimlar hisobga olinib, sog‘lig‘i yaxshi ekanini ta’kidladilar.

BAE Systems, shuningdek, portlash sabablari bo‘yicha allaqachon to‘liq tergov boshlaganini, ammo hozirda mavjud bo‘lgan ma’lumotlarga ko‘ra, bu tasodifiy bo‘lgani va buning ortida jinoiy maqsad yo‘qligini ta’kidladi.

- Favqulodda yordam guruhimiz ob’ektni kuzatishda davom etmoqda, - deyiladi kompaniya bayonotida.

Keyinchalik, zavod joylashgan Monmut okrugi bo‘yicha Jamoatlar palatasining a’zosi Devid T. S. Devis (u ham Uels Davlat kotibi) portlash " snaryadlarni demontaj qilish uchun ajratilgan uchastkaning chekka qismida sodir bo‘lgani"ni aytdi.

- Menga aytishdiki, bu maxsus operasiya har doim kichik xavfni o‘z ichiga oladi, shuning uchun u korxonaning maxsus ajratilgan hududida masofadan boshqarish orqali amalga oshiriladi. Jamoatchilik uchun hech qanday xavf yo‘q, - deya qo‘shimcha qildi u.

BAE Systems nafaqat Britaniyaning eng yirik mudofaa kompaniyasi, balki o‘q-dorilar, raketa otish moslamalari va artilleriya tizimlarini ishlab chiqaradigan Yevropadagi eng yirik mudofaa pudratchisi hisoblanadi.