«BOSHQASIGA UYLANIB, BOLA PULI OLIB YURGAN EKAN»

— Jiyanim eri bilan birga yashamaydi. Yaqinda kelin bo‘lib tushgan mahallasidan qo‘ng‘iroq qilib, bola puli olishi uchun qayta ariza berishi kerakligini, avvalgisining muddati tugaganini aytishdi. Surishtirsa, sobiq eri unga aytmasdan o‘g‘liga bola puli rasmiylashtirgan va bu haqda unga aytmagan ekan. Bola jiyanimning tarbiyasida, alimentga bermagan. Bu vaziyatda jiyanimning qanday haq-huquqlari bor? Sobiq eri jiyanimning nomidan foydalangani uchun sudga berishi mumkinmi?
Ismi sir tutildi

Jasur NORQOBILOV, fuqarolik ishlari bo‘yicha Mirzo Ulug‘bek tumanlararo sudi sudyasi:

— Kam ta’minlangan oilalar bolalari uchun nafaqa va moddiy yordam tayinlash va to‘lash tartibi Vazirlar Mahkamasining 2021 yil 21 oktyabrdagi 654-sonli qarori bilan tasdiqlanlangan “Kam ta’minlangan oilalarni «Ijtimoiy himoya yagona reestri» axborot tizimi orqali aniqlash, ularga kam ta’minlangan oilalar bolalari uchun nafaqa va moddiy yordam tayinlash va to‘lash tartibi to‘g‘risida”gi Nizom bilan tartiga solingan. Mazkur Nizomning 13-bandiga ko‘ra, “kam ta’minlangan”, deb e’tirof etilgan oilaga bolalar nafaqasi yoxud moddiy yordam yashash joyi bo‘yicha oilaning muomalaga layoqatli a’zosining yozma arizasiga asosan tayinlanadi. 15-bandiga ko‘ra, Bolalar nafaqasi yoki moddiy yordam tayinlash uchun Byudjetdan tashqari Pensiya jamg‘armasining tuman (shahar) bo‘limi boshlig‘ining nomiga ushbu Nizomga 3-ilovaga muvofiq shakldagi ariza fuqarolarning o‘zini o‘zi boshqarish organiga taqdim etiladi.
Arizaga quyidagilar ilova qilinadi:
• ariza beruvchi va oila a’zolarining O‘zbekiston Respublikasi pasporti yoki ID-kartalari (bunda fuqarolarning o‘zini o‘zi boshqarish organi tomonidan ushbu hujjatlarning nusxasi olinib, asli arizachiga qaytariladi);
• chet el fuqarolari, fuqaroligi bo‘lmagan shaxslarning yashash guvohnomalari, fuqaroligi bo‘lmagan shaxs guvohnomalari yoki ID-kartalari hamda yashash joyi bo‘yicha ro‘yxatga olinganligi to‘g‘risida qayd varag‘i (bunda fuqarolarning o‘zini o‘zi boshqarish organi tomonidan ushbu hujjatlarning nusxasi olinib, asli arizachiga qaytariladi);
• bolalari vasiylik ostida bo‘lgan taqdirda, arizaga vasiylik va homiylik organi qarorining nusxasi ilova qilinadi;
• oilaning mavjud chorva mollari va parrandalari to‘g‘risida ushbu Nizomga 3a-ilovaga muvofiq shakl bo‘yicha ma’lumot;
• ariza beruvchi va uning oila a’zolari nomidagi tijorat banki hisobvaraqlaridagi mablag‘ qoldiqlari va ariza berilgan oydan oldingi 3 oy mobaynida ularning nomiga o‘tkazilgan pul o‘tkazmalari yuzasidan ma’lumotlarni Markaziy bank tomonidan «Yagona reestr» ATga taqdim etish to‘g‘risida oilada birga yashovchi 18 yosh va undan katta yoshdagi muomalaga layoqatli barcha oila a’zolari imzolari bilan tasdiqlangan ushbu Nizomga 3b-ilovaga muvofiq shakl bo‘yicha ariza.
Bunda birga yashovchi 18 yosh va undan katta yoshdagi muomalaga layoqatli barcha oila a’zolari imzolarining haqiqiyligi uchun ariza beruvchi javobgar bo‘ladi. Ariza beruvchi tomonidan ushbu bandda keltirilgan barcha hujjatlarning to‘liq taqdim etilganligi fuqarolarning o‘zini o‘zi boshqarish organi tomonidan tekshiriladi.
Yo‘llagan savolingizda qayd etilishicha, siz turmush o‘rtog‘ingiz bilan birgalikda yashamagansiz va turmush o‘rtog‘ingiz bola puli olib yurganidan bexabar bo‘lgansiz.
Savolingizdan kelib chiqilganida, turmush o‘rtog‘ingiz bolali oilalarga nafaqa yoki bola parvarishi bo‘yicha nafaqa olish haqida arizalar va unga ilova hujjatlarni taqdim etishda haqqoniy ma’lumotlarni taqdim qilmaganligi ko‘rinadi.
Bunday holda, bolali oilalarga nafaqa yoki bola parvarishi bo‘yicha nafaqa haqqoniy ma’lumotlar yashirilganligi sababli asossiz ajratilgan hisoblanadi va to‘langan pullarni byudjetga undirilishi yuzasidan moliya organlari sudga murojaat qilishi kerak bo‘ladi.
Siz esa, yuqorida qayd qilingan nizom talabidan kelib chiqib, fuqarolarning o‘zini o‘zi boshqarish organiga bolalar nafaqasi yoxud moddiy yordam uchun murojaat qilishingiz mumkin.