Bog‘chalarda qo‘shimcha pullik xizmatlar ko‘rsatish to‘g‘risidagi nizom tasdiqlanadi

Normativ-huquqiy hujjatlar loyihalari muhokamasi portalida Davlat maktabgacha ta’lim muassasalarida qo‘shimcha pullik ta’lim-tarbiya xizmatlari ko‘rsatish faoliyatini tashkil etish tartibi to‘g‘risidagi nizom loyihasi joylashtirildi.

Mazkur Nizom talablari davlat maktabgacha ta’lim muassasalari uchun tatbiq etiladi.

Qo‘shimcha xizmatlar zarur moddiy-texnik baza hamda tegishli pedagog xodimga ega bo‘lgan yoki tegishli mutaxassis jalb qilingan holda maktabgacha ta’lim muassasasida tashkil qilinishi mumkin. Bunda qo‘shimcha xizmatlarni ko‘rsatish bolaning maktabgacha ta’lim muassasasining o‘quv dasturi bo‘yicha olib boriladigan ta’lim-tarbiya jarayoniga xalaqit bermasligi kerak.

O‘zbekiston Respublikasi Prezidentining 2018 yil 30 sentyabrdagi PQ 3955-son qarori bilan tasdiqlangan 2018-2019 yillarda maktabgacha ta’lim tizimini yanada takomillashtirishga doir qo‘shimcha chora-tadbirlar dasturiga asosan maktabgacha ta’lim muassasalari tomonidan quyidagilar bo‘yicha qo‘shimcha pullik xizmatlar ko‘rsatilishi mumkin:

dam olish kunlari va maktabgacha ta’lim muassasasida ish kuni yakunlangandan keyin bolani parvarishlash, unga qarab turish, uni o‘qitish;

maktabgacha ta’lim muassasasining o‘quv dasturdan tashqari sport-sog‘lomlashtirish (karate, taekvondo, suzish, shaxmat, shashka, gimnastika, massaj va boshqalar) to‘garaklari, badiiy-estetik (xor, raqs, tasviriy san’at va hokazolar) to‘garaklar, fanlar bo‘yicha to‘garaklar (chet tillari, matematika, aqliy arifmetika, mantiq, informatika va boshqalar).

Maktabgacha ta’lim muassasasi tomonidan ko‘rsatilishi rejalashtirilayotgan qo‘shimcha xizmatlar turlari hamda ular uchun belgilanadigan to‘lovlar miqdori maktabgacha ta’lim muassasasining kuzatuv kengashi yig‘ilishida muhokama qilinishi shart.

Maktabgacha ta’lim muassasalari tomonidan ko‘rsatiladigan qo‘shimcha xizmatlarning narxlar preyskuranti tegishli hududiy bo‘linma bilan kelishilgan holda maktabgacha ta’lim muassasasining rahbari tomonidan tasdiqlanadi.

Qo‘shimcha xizmatlar tegishli maktabgacha ta’lim tuman (shahar) bo‘linmasi bilan kelishilgan holda maktabgacha ta’lim muassasasi rahbarining buyrug‘iga muvofiq quyidagi hujjatlar asosida tashkil etiladi:

ko‘rsatiladigan qo‘shimcha xizmatning ish rejasi (bundan buyon matnda ish reja deb yuritiladi);

ko‘rsatiladigan qo‘shimcha xizmatlarning preyskurant narxlari;

ko‘rsatiladigan qo‘shimcha xizmatlar bo‘yicha mashg‘ulotlar jadvali.

Ish reja maktabgacha ta’lim muassasasi rahbari tomonidan tasdiqlanadi.

Tasdiqlangan qo‘shimcha xizmatlarning preyskurant narxlari maktabgacha ta’lim muassasasining barcha shaxslar kirishi va ko‘rishi mumkin bo‘lgan joyda (joylarda) e’lonlar taxtasiga osib qo‘yiladi.

Maktabgacha ta’lim muassasasida tashkil etilgan qo‘shimcha xizmat ko‘rsatuvchi guruhlarga 3-7 yoshgacha bo‘lgan maktabgacha ta’lim muassasalari tarbiyalanuvchilari qabul qilinishi mumkin.

Farzandi qo‘shimcha xizmat ko‘rsatuvchi guruhlarda tarbiyalanishini istagan ota-onalar yoki ularning o‘rnini bosuvchi shaxslar tegishli maktabgacha ta’lim muassasasiga ariza bilan murojaat qiladi.

Qo‘shimcha xizmat ko‘rsatuvchi guruhlarga tarbiyalanuvchilarni qabul qilish ota-onalar yoki ularning o‘rnini bosuvchi shaxslarning xohishiga ko‘ra ixtiyoriy ravishda amalga oshiriladi.

Maktabgacha ta’lim muassasasining rahbari hamda bolaning ota-onasi yoki ularning o‘rnini bosuvchi shaxslardan biri bilan shartnoma tuziladi.

Qo‘shimcha xizmat ko‘rsatuvchi guruhlarga bolani qabul qilish uchun tegishli maktabgacha ta’lim muassasasi rahbarining buyrug‘i qabul qilinadi.

Buyruqda bolaning F.I.O., tug‘ilgan yili, qabul qilinayotgan qo‘shimcha xizmat turi va guruhi ko‘rsatilishi lozim.

Qo‘shimcha xizmat ko‘rsatuvchi guruhlarda bolalarning soni 25 nafardan ortiq bo‘lishiga yo‘l qo‘yilmaydi.

Maktabgacha ta’lim muassasasi xodimlarini ularning asosiy ish vaqtidan tashqari vaqtlarda kelishuv asosida qo‘shimcha xizmat ko‘rsatuvchi guruhlarga jalb qilish mumkin.

Sud hukmi bilan yoki tibbiy xulosaga muvofiq pedagogik faoliyat bilan shug‘ullanishi taqiqlangan shaxslarning qo‘shimcha xizmat ko‘rsatuvchi guruhlar faoliyat yuritishi taqiqlanadi.

Kun.uz