Bloger Sherzod Mamadaliyev qanday kaltaklanganini aytib berdi

Instagram platformasida turli hazillar bilan ijod qilayotgan bloger Sherzod Mamadaliyev kaltaklanib ketilgani aks etgan xabar ijtimoiy tarmoqlarga tarqaldi. “Daryo” muxbiri bloger bilan bog‘lanib, vaziyatga oydinlik kiritdi.

— Voqea 28 oktyabr kuni soat 22:30 larda sodir bo‘ldi. Savdo markazi yonida Ichki ishlar xodimi bilan gaplashib turgandim. Bir yigit kelib, musht tushirdi. U yigitni avval ham ko‘rganman, gaplashganman. Ammo nima maqsadda bu ishni qilganini tushunmay qoldim. Keyin bilsam sportchi yigit ekan, zarbadan keyin o‘zimni o‘nglolmay qoldim. Besh kun Farg‘onadagi kasalxonada davolandim. Yuz suyagim singan, ko‘zim ham jiddiy jarohat olgan. Tekshiruvlarga ko‘ra, ko‘zlarim ham gemotoma bo‘lgan, agar vaqtida davolanmasa, ko‘rish darajasi jiddiy pasayishi mumkin ekan. Hozir Toshkentdagi xususiy klinikada davolanyapman, — deydi Sherzod Mamadaliyev.

Farg‘ona viloyati IIB axborot xizmatining ma’lum qilishicha, ushbu holat yuzasidan Jinoyat kodeksining 105-moddasi (qasddan badanga o‘rtacha og‘ir shikast yetkazish) 2-qismi “i” bandi bilan jinoyat ishi qo‘zg‘atilib, 3 nafar shaxs gumonlanuvchi sifatida Jinoyat-prosessual kodeksining 221-moddasi (ushlab turish asoslari) tartibida ushlangan.

Eslatib o‘tamiz, Sherzod Mamadaliyev aslida professional sirk aktyori hisoblanadi. U nafaqat o‘zbek, balki Xitoy sirkida ham faoliyat yuritgan. Ammo oxirgi paytlarda u asosan ijtimoiy tarmoqlarda qiz-ayollar ovozini taqlid qilgan videolarni joylayotgan edi.