Ayol — jamiyat gultoji, borliq ko‘zgusi, millat tarbiyachisi

Ayol — jamiyat gultoji, borliq ko‘zgusi, millat tarbiyachisi. Uning mehr-muhabbati navnihollarni, ertamiz egalarining unib-o‘sishiga, kamol topishiga sabab bo‘ladi. Ayol baxtli bo‘lsa, jamiyat baxtli bo‘ladi. Xotin-qizlarni e’zozlagan, qadrlagan yurtning esa buguni va ertasi shubhasiz farovondir!

Bugungi kunda ham hukumatimiz tomonidan xotin-qizlarning huquq va manfaatlarini ta’minlash, jamiyatda qadrini va qaddini ko‘tarish maqsadida qator ishlar amalga oshirilmoqda. Bu xayrli ishlarning samarasini esa barcha opa-singillarimiz o‘z hayotlari, umr yo‘llari davomida his etishmoqda. Shu bilan birga ko‘rsatilayotgan mehr-muhabbatni yuksak baholab, barcha sohalarda o‘z bilim va salohiyatlarini ko‘rsatmoqda, jahon arenalarida davlatimiz bayrog‘ini yanada baland tutmoqda, yer yuzidagi eng mashhur, yirik kompaniyalarda mehnat qilib, o‘zbeklarning salohiyatini namoyish qilmoqda.

Albatta, kelajagi buyuk, ertasi farovon bo‘lishini istagan xalq millat davomchilarini qay soha vakili bo‘lmasin ko‘ngli tinch, hayoti farovon bo‘lishi uchun harakat qiladi, munosib turmush kechirishlari uchun sharoit yaratadi.

Yurtimizda xotin-qizlarning huquq-imkoniyatlarini kengaytirish, davlat boshqaruvi va jamiyatning barcha jarayonlarida ularning rolini oshirishga qaratilgan tizimli islohotlar amalga oshirilmoqda. Bularning barchasi gender tenglik sohasida amalga oshirilayotgan davlat siyosatining asosiga aylangani ham hech birimizga sir emas. Davlat boshqaruvida ayollar vakillarini ko‘paytirish uchun yetakchi lavozimlarni egallashga qodir 15 ming nafardan ortiq xotin-qizlardan kadrlar zaxirasi shakllantirildi. O‘zbekiston tarixida ilk bor milliy parlamentdagi ayollar soni 32 foizga yetdi. Mamlakatdagi rahbarlik lavozimidagi ayollar soni esa 30 foizni ko‘rsatmoqda.

Joriy yil 1 mart kuni Prezidentimiz Shavkat Mirziyoyev raisligida xotin-qizlarni qo‘llab-quvvatlash tizimi hamda ularning jamiyatdagi mavqeini yanada mustahkamlash masalalari bo‘yicha o‘tkazilgan videoselektor yig‘ilishi ham bu masalaga alohida e’tibor qaratildi. Kelgusi o‘quv yilidan boshlab jamiyatimizda olima ayollar ulushini sezilarli oshirish uchun doktarantura yo‘nalishida xotin-qizlar uchun har yili kamida 300 tadan maqsadli kvota ajratilishini bildirdi. Bu yangilikni ilmga tashna opa-singilllarimiz katta quvonch va hayajon bilan qarshi oldi. «Ma’rifat» targ‘ibotchilar jamiyatining 150 nafardan ortiq ilm-fan, san’at va adabiyot sohalarida faoliyat olib borayotgan opa-singillarimiz, bir so‘z bilan aytganda millatizning ziyoli a’zolari ham ushbu yangilikdan xursand bo‘ldi. Bu yo‘lda davlatimiz rahbarining yonida bo‘lishlarini bildirdi.

Respublika Ma’naviyat va ma’rifat markazi «Ma’rifat» targ‘ibotchilar jamiyati ayollarni qo‘llab-quvvatlash, ularning ma’naviy olamini boyitish, qizlarni oilaga tayyorlash, ularni millat tarbiyachisiga aylantirish bo‘yicha qator loyihalarni amalga oshirib kelmoqda. Xususan, o‘tgan yil davomida professor, dosent ayollarning uslubiy qo‘llanmalari, ilmiy risolalari nashr ettirildi, «Ma’naviyat festivali» davomida o‘tkazilgan psixologik treninglar natijasida ko‘plab ajrim yoqasidagi oilalarning yarashuviga erishildi. «Mening farzandim O‘zbekiston faxri» loyihasi doirasida 100 nafar iste’dodli, sportchi yoshlarning onalari taqdirlandi va boshqalargi o‘rnak sifatida ko‘rsatildi. Ma’naviy-ma’rifiy ishlarni amalga oshirish, yuksak ijtimoiy-ma’naviy muhitni shakllantirish borasidagi samarali faoliyati uchun 17 nafar xotin-qizlar «Ma’naviyat fidoiysi» ko‘krak nishoni bilan taqdirlandi. Respublikamizning 4 ta hududida o‘tkazilgan «Maqom kechalari» konsert dasturlari davomida O‘zbekiston xalq artistlari, O‘zbekistonda xizmat ko‘rsatgan artistlarlar bilan birga yosh iste’dod egalari, maqom yo‘nalishida tahsil olayotgan o‘quvchi qizlar ham bir sahnada qo‘shiq ijro etish imkoniga ega bo‘ldi. Bu ularga katta sahnaga chiqishlarida debocha bo‘lib xizmat qiladi.

Ayni paytda xotin-qizlarni har tomonlama qo‘llab-quvvatlash, ularni jamiyatda tutgan o‘rnini oshirish, turli sohalarda faol xizmat qilayotgan olimalar, ziyoli ayollar hamda munis opa-singillarimizning qadr-qimmatini yuksaltirish, mehnatlarini e’tirof etish maqsadida Respublika Ma’naviyat va ma’rifat markazi «Ma’rifat» targ‘ibotchilar jamiyati tomonidan 8 mart — Xalqaro xotin-qizlar kuni munosabati bilan «Ayolga ehtirom!» loyihasi o‘tkazildi. Ushbu tadbirlar davomida yurtimizdagi 500 nafardan ziyod xotin-qizlarga bayram tuhfalari taqdim etildi.

Ana shunday tadbirlardan biri joriy yilning 3 mart kuni Yakkasaroy tuman obodonlashtirish boshqarmasida mehnat qilayotgan ayollarni tabriklash, ularga ko‘tarinki kayfiyat baxsh etish maqsadida «Ayolga ehtirom!» loyihasi amalga oshirildi. Loyiha doirasida obodonlashtirish ishlari olib borilayotigan hududlarga borilib, o‘sha yerning o‘zida ayollar bilan dildan suhbat qurildi. Tadbirda el suygan san’atkorlar, O‘zbekiston Xalq artistlari, «Ma’rifat» targ‘ibotchilar jamiyati a’zolari ishtirok etdi. So‘zga chiqqanlar go‘zallik va nafosat bayrami bo‘lgan 8 mart – Xalqaro xotin-qizlar kuni munosabati bilan chin qalbdan tabriklashdi. Ularga iliq tilaklarini bildirishdi. Shundan so‘ng Yakkasaroy obodonlashtirish boshqarmasida faoliyat olib borayotgan 200 nafarga yaqin xotin-qizlarga «Ma’rifat» targ‘ibotchilar jamiyati tomonidan bayram tuhfalari topshirildi.

Falsafa fanlari doktori, professor Jamila Shermuhammedova ayollar bilan samimiy muloqot qilib, ularga o‘zining samimiy tilaklarini bildirdi.

— Davlatimizda xotin-qizlarga e’tibor, g‘amxo‘rlik yuksak darajadaligini bugun barchamiz yurak-yurakdan his qilyapmiz. Ayniqsa, Prezidentimiz Shavkat Mirziyoyev raisligida xotin-qizlarni qo‘llab-quvvatlash tizimi hamda ularning jamiyatdagi mavqeini yanada mustahkamlash masalalariga bag‘ishlab o‘tkazilgan videoselektordagi so‘zlari o‘zbek ayollarini yanada ruhlantirdi, ertangi kunga ishonchini yana bir bor mustahkamladi, desam yanglishmagan bo‘laman.

Respublika Ma’naviyat va ma’rifat markazi «Ma’rifat» targ‘ibotchilar jamiyati tomonidan obodonlashtirish xodimalari ishtirokida o‘tkazilayotgan bugungi tadbir davomida ham opa-singillarimiz yangi o‘quv yilidan boshlab qizlarga ilk marotaba 7 yil muddatga foizsiz kredit berish, ehtiyojmand oila vakillari, ota yoki onasini yo‘qotgan talaba qizlarning ta’lim kontrakti esa mahalliy budjetdan to‘lab berish amaliyoti joriy etilishini eshitib quvonganini bildirishdi. Haqiqatdan ham bu yangiliklar 8 mart — Xalqaro xotin-qizlar kuni bayramiga butun o‘zbek xalqi, ayniqsa ilm talab qizlarimiz uchun katta sovg‘a bo‘ldi. Shuni ayishim kerakki, men mamlakatimizda amalga oshirilayotga islohotlar eng quyi qatlamgacha yetib borayotgandan, muhimi bu harakatlardan xalqimiz rozi bo‘layotganidan juda xursand bo‘ldim.

Yakkasaroy tuman obodonlashtirish boshqarmasi ishchisi Feruza o‘z taassurotlarini biz bilan o‘rtoqlashdi:

–Poytaxtimiz ko‘chalarini ozodaligini saqlash uchun erta tongdan ishga yo‘l olamiz. Kimdir xizmatimizdan mamnunligini aytib, o‘z minnatdorchiligini bildirganida ko‘nglimiz tog‘dek ko‘tariladi.

Bugun qo‘lida lolalarni tutib biz tomonga yurib kelayotgan «Ma’rifat» targ‘ibotchilarini ko‘rib hayron qoldik. Sovg‘alarni taqdim etishganda qanchalar xursand bo‘lganizmizni aytmay qo‘yaqolay. Bahorni lolalarsiz tasavvur etib bo‘ladimi?!

Biz televizorda ko‘radigan san’atkorlar bilan yonma-yon turib suhbatlashdik, suratga tushdik. Ular iliq tilaklar bildirishdi. Bugungi kun uchun esa Respublika Ma’naviyat va ma’rifat markazi «Ma’rifat» targ‘ibotchilar jamiyati a’zolariga minnatdorchilik bildiramiz.

Quvonchimning cheki yo‘q deya so‘z boshlaydi Yakkasaroy tuman obodonlashtirish boshqarmasi ishchisi Dildora Usmonova.

– Bugun bahor nafasini beradigan gullarni qo‘limizga tutishganida barcha ayollar o‘zimizni juda baxtli his etdik. Bizga ulashilgan sovg‘alar ham juda yoqdi. Bayram arafasida Falsafa fanlari doktori, professor Jamila Shermuhammedova bilan uchrashish shaxsan men uchun kutilmagan sovg‘a bo‘ldi. Qolaversa sevimli aktyorlarimiz Mehmonali Salimov, Tolib Xojiyev, Rasulxon Qodirxonov, Xurshid Sobirov bilan yuzma-yuz suhbatlashdik. Tadbirni tashkil etgan barcha mas’ullarga katta rahmat aytmoqchiman. Ayollarni e’zozlagan, ularga hurmat ko‘rsatganlar hech qachon kam bo‘lmasin.

O‘zbeksitonda xizmat ko‘rsatgan artist, «Ma’rifat» targ‘ibotchilar jamiyati a’zosi Mehmonali Salimov barcha xotin-qizlarga o‘z tabriklarini bildirdi:

–Bahorning ilk bayrami 8 mart — Xalqaro xotin-qizlar kunidir. Bu ham bejiz emas. Bahor faslidek go‘zal ayollarimiz hayot davomchi. Biz ularga qanchalik ehtirom ko‘rsatsak, qadrlasak shuncha kam.

Bugun «Ma’rifat» targ‘ibotchilari ziyolilar, olimlar va san’atkorlar ishtirokida Yakkasaroy tuman obodonlashtirish boshqarmasida faoliyat olib borayotgan opa-singillarimizga bahoriy xushkayfiyat ulashish maqsadida «Ayolga ehtirom!» loyihasini o‘tkazdi.
Fursatdan foydalanib, yurtimizdagi barcha opa-singillarimiz, qizlarimizni 8 mart — Xalqaro xotin qizlar kuni bilan chin qalbimdan tabriklayman. Ularga sihat-salomatlik, xonadonlariga fayz-baraka, baxtu saodat tilayman. Yana bir bor bayramingiz muborak bo‘lsin!

Jarayondan fotolavhalar...