AQShda prezidentlik saylovlari boshlandi

AQShda prezidentlik saylovlari boshlandi, unda fuqarolar navbatdagi prezidentni tanlaydi. Butun dunyo bu jarayonni diqqat bilan kuzatib bormoqda, chunki saylov natijalari xalqaro maydondagi kuchlar muvozanatini o‘zgartirishi mumkin.

Mamlakat bo‘ylab saylov uchastkalari 5 noyabr kuni turli vaqtlarda ochiladi.

Vermont mahalliy vaqt bilan ertalab soat 5 da ovoz berishni boshlagan birinchi shtat bo‘ladi va 19:00 gacha davom etadi. Undan keyin ertalab soat 6:00 da Konnektikut, Kentukki, Meyn, Nyu-Jersi, Nyu-York va Virjiniya shtatlarida saylov uchastkalari ochiladi. Shimoliy Karolina, Ogayo va G‘arbiy Virjiniya shtatlarida saylov uchastkalari 6:30 da ochiladi. 37 ta shtatda va Kolumbiya okrugida saylovlar ertalab soat 7:00 dan 10:00 gacha boshlanadi. So‘nggi saylov jarayoni Vashington shtati va Alyaskada soat 11:00da va Gavayida soat 12:00da boshlanadi.

Amerikalik saylovchilar oltita prezidentlikka nomzodlardan biri uchun ovoz beradi: Kamala Xarris (vise-prezident, Demokratik partiya), Donald Tramp (sobiq prezident, Respublikachilar partiyasi), Kornel Uest (falsafa professori, yozuvchi, ilohiyotchi, xristian sosialist, mustaqil nomzod), Jill Stayn (shifokor, Yashillar partiyasi), Cheyz Oliver (faol, Libertar partiyasi) va Klaudiya De la Kruz (ijtimoiy faol va cherkov pastori, Sosializm va ozodlik partiyasi).

Barcha AQSh fuqarolari joriy yil 15 oktyabrga qadar ovoz berish uchun ro‘yxatdan o‘tishlari kerak. Ovoz berish maqsadida ro‘yxatdan o‘tish uchun AQSh fuqarosi va ovoz bergan shtatda doimiy rezident bo‘lish kerak. Saylovchi kamida 18 yoshga to‘lgan, aqliy qobiliyatli va boshqa shtatda ovoz berish uchun ro‘yxatdan o‘tmagan bo‘lishi kerak.

Saylov byulletenlari joriy yil 16 oktyabrdan 22 oktyabrgacha pochta orqali jo‘natilgan bo‘lib, ular 5 noyabr kuni soat 20:00 dan kechiktirmay pochta markasi qo‘yilgan holda qaytarilishi yoki saylov kuni saylov qutisiga tashlab yuborilishi kerak.

Mamlakatda yuzlab xalqaro kuzatuvchilar ovoz berish jarayonini kuzatib turibdi.