Andijonda 3 ta nihol 2 mlrd so‘mga sotib olingani haqida xabarlar tarqaldi
Bugungi kunda ijtimoiy tarmoqlarda Andijon shahar hokimligi obodonlashtirish boshqarmasi tomonidan “2 mlrd so‘mga 3 ta nihol sotib olingani” to‘g‘risida asoslanmagan va noholis axborotlar tarqatilmoqda.
Mazkur holat viloyat hokimligi tomonidan moliyalashtirish mutaxassislarini jalb qilgan holda o‘rganib chiqilganda, aytilgan iddaolar mutlaqo tasdig‘ini topmadi. Ushbu mablag‘larga 5000 donadan ortiq daraxtlar sotib olingani to‘g‘risida OAV va ijtimoiy tarmoqlar orqali jamoatchilikka rasmiy va xalqchil tarzdagi tushuntirishlar berildi.
Shunga qaramasdan, ijtimoiy tarmoqlardagi sahifalar va OAVlar tomonidan hanuzchaga ushbu noto‘g‘ri ma’lumotlar tarqatilmoqda. Ularning bunday harakatlari davlat institutlariga nisbatan ishonchsizlikni keltirib chiqarmoqda.
Zero, “Axborotlashtirish to‘g‘risida”gi Qonunning 121-moddasida veb-saytning va (yoki) veb-sayt sahifasining egasi, shu jumladan, bloger hamma erkin foydalanishi mumkin bo‘lgan axborot joylashtiriladigan internet jahon axborot tarmog‘idagi o‘z veb-saytiga yoki sahifasiga hamma erkin foydalanishi mumkin bo‘lgan axborotni joylashtirishdan avval uning to‘g‘riligini tekshirishi, joylashtirilgan axborotning noto‘g‘riligi aniqlangan taqdirda uni darhol o‘chirib tashlashi shartligi belgilangan.
Qonunninng 121-moddasida esa, internetda tarqatilishi mumkin bo‘lmagan axborot turlari belgilangan. Xususan, yolg‘on axborotni hamda jamiyatga va davlatga hurmatsizlikni namoyon etuvchi ma’lumotlarni tarqatish ta’qiqlangan.
“Jurnalistlik faoliyatini himoya qilish to‘g‘risida”gi Qonunning 6-moddasida esa jurnalist o‘zi tayyorlayotgan materiallarining to‘g‘ri yoki noto‘g‘ri ekanligini tekshirishi va holis axborot taqdim etishi shart, deya belgilangan.
Andijon viloyati hokimligi OAV vakillaridan haqiqatga mos bo‘lmagan, yolg‘on yoki tekshirilmagan axborotlarni jamoatchilikka tarqatmaslikni, fuqarolarimiz orasida turli xil tushunmovchiliklarni keltirib chiqarishga yo‘l qo‘ymaslikni so‘rab qoladi.
Shu bilan birga, aholi orasida yolg‘on, haqiqatga to‘g‘ri kelmaydigan ma’lumotlar va materiallarni har qanday shaklda tarqatganlik uchun javobgarlik mavjudligini eslatib o‘tadi.
