Allohning xohishi bo‘lsagina, farzand yaraladi

Alloh taolo birinchi inson Odam otani loydan yaratdi. Bu haqda U Zotning O‘zi «Mu’minun» surasida shunday deb marhamat qiladi:

ﮕ ﮖ ﮗ ﮘ ﮙ ﮚ ﮛ ﮜ

«Qasamki, batahqiq, insonni loy zubdasidan yaratdik» (12‑oyat).

U kishidan jufti – momo Havvoni yaratdi. So‘ngra ikkovlaridan ko‘plab erkak va ayollarni tarqatdi.

Alloh taolo «Niso» surasida bunday deydi:

ﭑ ﭒ ﭓ ﭔ ﭕ ﭖ ﭗ ﭘ ﭙ ﭚ ﭛ ﭜ ﭝ ﭞ ﭟ ﭠ ﭡ

«Ey odamlar! Sizlarni bir jondan yaratgan va undan uning juftini yaratib, ikkovlaridan ko‘plab erkagu ayollar taratgan Robbingizdan qo‘rqinglar!» (1‑oyat).

Ushbu oyatdagi ulkan haqiqatlardan biri «...va undan uning juftini yaratib» jumlasida o‘z aksini topgandir. Ya’ni bundan «O‘sha jondan uning juftini – xotinini yaratgan», degan ma’no kelib chiqadi.

«...va ikkovlaridan», ya’ni o‘sha «bir jon» bo‘lmish Odam va uning jufti – Havvodan

«ko‘plab erkagu ayollarni taratgan»i ham muhim bir haqiqatdir. Alloh taolo agar xohlasa, birdaniga xilma-xil, son-sanoqsiz erkagu ayollarni yaratishga ham qodir edi. Ammo U Zot bunday qilishni xohlamadi. Yer yuzidagi turli insonlarning qarindoshlik aloqalari, oila rishtalari ila o‘zaro bog‘liq bo‘lishlarini iroda qildi. Islomda oilani mustahkamlashga katta e’tibor berilishining siri ham shunda.

Shuning uchun ham yangi oila qurgan har bir er‑xotin qo‘shilishlari bilan orada farzand bo‘lishi masalasi ham yuzaga chiqadi. Zotan, oila qurishdan sof tabiatli inson ko‘zlaydigan bosh maqsadlardan biri ham farzand ko‘rishdir.

Alloh taolo dunyodagi hamma jonzotlarni, narsalarni, hayvonlarni bir-biriga bog‘liq, bir-biriga mos, bir-biridan manfaat oladigan qilib yaratgan. Shu jumladan, insonlarda jinsiy aloqa masalasini erkak va ayolga bog‘lab qo‘ygan. Haqiqiy jinsiy aloqa, lazzat, undan keladigan samara – farzand ana o‘sha tabiiy aloqa orqali vujudga keladi. Alloh taoloning inson zotini juft qilib yaratishidagi hikmat ham ana shunda.

Alloh taolo «Naba’» surasida bunday deb marhamat qiladi:

ﭬ ﭭ ﭮ

«Va sizlarni juft qilib yaratdik» (8‑oyat).

Ya’ni, erkak va ayol qilib.

Ha, Alloh taolo odam zotini juft qilib, erkak-ayol qilib yaratishining o‘zi ulkan mo‘’jizadir. Avvalo, erkak va ayolning tuzilishi va erkakligu ayollik xususiyatlari ulkan mo‘’jizalardir. Bu ishni Alloh taolodan boshqa hech kim qila olmaydi. Bu ishga faqatgina Alloh taoloning yolg‘iz O‘zi qodirdir.

Qolaversa, har bir juftning har ikki tomoniga o‘zidan nasl qoldirishga cheksiz muhabbat berib qo‘yilgandir. Hattoki, ular o‘zidan nasl qoldirish yo‘lida jon berishga ham tayyor darajaga yetadilar. Ko‘p ayollar o‘limni bo‘yniga olib, farzand ko‘rishga qaror qiladilar. Umuman olganda esa, har bir homilador ayolda bu jur’at bordir. Tug‘ilgan farzandni tarbiyalab, o‘stirish mashaqqat, og‘ir va tinimsiz mehnatdan iborat. Xo‘sh, ushbu omilni har bir inson tabiatiga kim solib qo‘ygan? Nima uchun bu narsa millionlab yillardan buyon davom etib, inson naslining yer yuzida bardavom qolishi vositasi bo‘lib kelmoqda? Albatta, bularni faqatgina Alloh taoloning yolg‘iz O‘zigina qilishi mumkin.

Odamlar Alloh joriy etgan tabiiy qoidalarga odatlanib qolganlar. Shu bois, bu hodisalarning har lahzada sodir bo‘lib turishini qonuniy yoki majburiy narsalar, deb biladilar. Bu qoidalar ularning ko‘z o‘ngida ko‘p takrorlanaverganidan, shu qarorga kelganlar. Biroq, ushbu qoidalarni joriy etgan Alloh uchun ayrim hollarni istisno etish ham hech gap emas.

Erkak va ayolning jinsiy unsiyatidan farzand paydo bo‘lishini Alloh taolo umumiy qoida qilib qo‘ygan. Aslida, erkak va ayol qo‘shilgan taqdirda ham, Allohning xohishi bo‘lsagina, farzand yaraladi. Bu haqiqatni ko‘pchilik unutib qo‘yadi. Unutiladigan haqiqatlarni bandalarning yodiga solib turish uchun, Alloh taolo har-har zamonda mazkur umumiy qoidalarga xilof hollarni ham yuzaga keltiradi. Ba’zi bir er va ayollarga farzand bermaydi. Agar bola yaralishining asosiy omili erkak va ayolning qo‘shilishigina bo‘lsa, nima sababdan hamma ham farzandli bo‘lavermaydi? Shuningdek, qartayib qolgan kishilardan farzand bo‘lmasligi ham odamlar uchun tabiiy qoida, ammo Alloh xohlasa, Zakariyo alayhissalomga berganidek, keksa juftlarga ham farzand ato qilaveradi. Alloh har bir narsaga qodir, chunonchi, xotini bo‘lmasa ham Odam Atodan Momo Havoni yaratganidek, erkakning o‘zidan ayol paydo qiladi. Aksincha, Bibi Maryamdan Iyso alayhissalomni yaratgani kabi, erkak bo‘lmasa ham ayolning bir o‘zidan farzand yaratishi mumkin. Shuningdek, Odam Atoni yo‘qdan bor qilganidek, na er va na ayolsiz ham turfa maxluqlarni hayot sahniga keltira oladi.

Mulohaza qilsak, mazkur hodisalarning barchasida ham Alloh taolo O‘zi yaratgan sababchi omillarni ishga soladi. Chunki U Zot bu dunyoni shu asosda yaratgan. Aslida, birgina «Bo‘l!» desa, Odam Ato bino bo‘lardi. Ammo bunday qilmadi. Dastavval uni O‘z qo‘li bilan loydan odam shaklida yasadi, bir muddatdan keyin uning ichiga jonni kiritdi.

Shunga o‘xshab, Zakariyo alayhissalomga ham tayyor o‘g‘ilni shunday tutqazib qo‘ymadi. Pushtsiz kampiri bilan qo‘shilganidan keyin ayol homilador bo‘ldi. Homila paydo bo‘lganining belgisi sifatida Alloh taolo Zakariyo alayhissalomni uch kun tilsiz qilib qo‘ydi. Nihoyat, farzand odatdagidek, tabiiy yo‘sinda dunyoga keldi.

Shuningdek, Odam Atodan Momo Havoni yaratishda ham o‘ziga xos bir qancha tadbirlar amalga oshirilgan.

Bokira Maryamdan erkak ishtirokisiz bola paydo qilish jarayoni qanday kechganiga kelsak, biz o‘rganayotgan oyatlarda aytilganidek, farishta Jabroil alayhissalom Maryamning oldiga kelib, uning ko‘ylagi yoqasidan puflagan va Maryam onamiz Iso alayhissalomga homilador bo‘lganlar.

Xuddi shuningdek, Alloh taolo erkak va ayol, agar farzand istasalar, buning uchun, birga nikohlanib yashashlarini va jinsiy qo‘shilishlarini shart qilib qo‘ydi. Alloh taolo dunyoda joriy qilgan sababiyat qonuni asosida o‘sha qo‘shilish bo‘lsagina, farzand bo‘lishini iroda qildi.

Ha, Alloh taolo insonni erkak va ayol jinsida yaratdi. Har biriga o‘ziga xos a’zolar va xususiyatlar berdi. Jumladan, inson naslini bardavom etish uchun har birini o‘ziga xos tanosil a’zolari bilan yaratdi. Inson naslini erkak va ayolning qo‘shilishi natijasida paydo bo‘ladigan qildi. Bu qo‘shilishdan ikkovlari ham tabiiy lazzat oladigan bo‘ldilar. Buning uchun ularda zarur a’zolar – his-tuyg‘u, hujayralar va shu kabi anvoyi moddalarni xalq qildi. Ushbu qo‘shilishdan hosil bo‘ladigan lazzat va rag‘batga nisbatan bo‘lgan qiziqishni farzandning g‘oyat qattiq azob bilan tug‘ilishi, uning tarbiyasi kabi mashaqqatlarni ham unutadigan darajada qudratli ayladi. Alloh taolo inson zotining jinsiy yaqinlik yo‘li bilan, ya’ni nikohlangan erkak va ayolning qo‘shilishi orqali pokiza yo‘l bilan ko‘payib turishini iroda qildi va buni hayotiy zaruratga aylantirdi.

Shu nuqtai nazardan aytish mumkinki, ayrim oilalarda, barcha shart-sharoitlar mujassam bo‘lishiga qaramay, farzand bo‘lmasligi Xoliq Alloh taoloning O‘zi ekani, oila qurish, jinsiy munosabat va boshqa farzand ko‘rish uchun kerak bo‘ladigan omillar faqatgina oddiy sabablar ekani, hamma narsa Alloh taoloning qudrati bilangina yuzaga kelishini namoyon qiladi.

Oila qurib yashayotgan kishilar ushbu haqiqatlarni anglab yetishlari lozim. Ular farzandni Alloh taoloning O‘zigina ato qilishi mumkinligini, er‑xotin bu borada sababdan boshqa narsa emasliklarini bir lahza ham unutmasliklari kerak. Shu bilan birga, o‘zlarining bo‘lajak farzandlari oldidagi burchlarini anglab yetib, o‘sha sharafli burchlarni ado etish payidan bo‘lishlari lozim.

«Baxtiyor oila» kitobidan