18 nafar shaxs jazoni o‘tashdan muddatidan oldin ozod qilindi
Xabaringiz bor, Toshkent shahar sudi va Toshkent shahar ma’muriy sudi tomonidan huquqiy jihatdan ko‘makka muhtoj fuqarolar uchun joylarda doimiy ravishda sayyor qabullar tashkil etib kelinadi. Bugun, 21 sentyabrdan boshlab, mazkur sudlar tomonidan fuqarolarning vaqti va naqdini tejash maqsadida yana sayyor qabullarni o‘tkazish boshlandi. Bu degani sudyalar har bir tumanga borgan holda fuqarolarning sud-huquq masalasidagi murojaatlariga quloq tutishadi.
Sudyalarning ilk manzili Yashnobod tumanidagi “Behizor” mahalla fuqarolar yig‘ini bo‘ldi. U yerda o‘tgan sayyor qabulda Toshkent shahar sudi raisi Erkin Xodjakulov, Toshkent shahar ma’muriy sudi raisi Ulug‘bek Almamedov, Toshkent shahar sudi rais o‘rinbosarlari — fuqarolik ishlari bo‘yicha sudlov hay’ati raisi Shuhrat Abbasov, jinoyat ishlari bo‘yicha sudlov hay’ati raisi Akbarali Turabov, iqtisodiy ishlar bo‘yicha sudlov hay’ati raisi Maqsudbek Saidov, Toshkent tumanlararo ma’muriy sudi raisi Suxrob Yuldoshev, fuqarolik ishlari bo‘yicha Mirobod tumanlararo sudi raisi Behzod Sagatov, jinoyat ishlari bo‘yicha Yashnobod tuman sudi raisi Abror Saidov hamda sudyalari fuqarolarning murojaatlarini qabul qilishdi.
Sayyor qabulda jami 74 nafar fuqarolar qabul qilindi. Qabul qilingan fuqarolarning 42 nafari jinoyat ishlari bo‘yicha, 26 nafari fuqarolik ishlari bo‘yicha, 3 nafari iqtisodiy ishlar bo‘yicha va 3 nafari ma’muriy sudlarga oid murojaatlarni tashkil etadi.
Shundan 48 nafar fuqaroning og‘zaki murojaati, 26 ta fuqaroning yozma murojaatlari qabul qilindi.
Jami 74 ta murojaatlardan 47 tasi bo‘yicha huquqiy tushuntirishlar berildi, 27 ta murojaat joyida ijobiy hal etilib, murojatlar qanoatlantirildi.
Shuningdek, jinoyat ishlari bo‘yicha Yashnobod tuman sudi tomonidan 18 nafar shaxs jazoni o‘tashdan muddatidan oldin ozod qilindi, 4 nafar manzil koloniyada jazoni o‘tayotgan fuqarolarning jazosi yengilrog‘iga almashtirilib, ozodlikni mahrum qilish jazosidan ozod etildi.
Xususan, jinoyat ishlari bo‘yicha Yashnobod tuman sudi sudyasi Farrux Ergashev raisligida 1996 yilda tug‘ilgan mahkumning ishi ko‘rib chiqildi.
— Jinoyat kodeksining transport vositalari harakati yoki ulardan foydalanish xavfsizligi qoidalarini buzish jinoyatni sodir etganim bois aybdor deb topilib, 2 yil muddatga oylik ish xaqining 20 foiz miqdorini davlat daromadi hisobiga ushlab qolgan holda axloq tuzatish ishlari jazosi tayinlangandi. Jazo muddatini o‘tashim uchun 2021 yilning dekabridan MCHJda chilangar sifatida ishlay boshladim, shu kunga qadar jazo muddatini o‘tab kelayotgandim. Toshkent shahar sudi tomonidan tashkil qilingan sayyor qabulda esa o‘rnatilgan tartib-qoidalarga rioya etib, yashash va ish joyimdan ijobiy tavsiflanganim, axlok tuzatish ishlari tariqasidagi jazoning 8 oyini o‘taganim bois muddatidan oldin shartli ravishda ozod kilish to‘g‘risidagi taqdimnoma sud tomonidan qanoatlantirildi. Jazoni 1/3 qismini o‘taganimni inobatga olib, o‘talmay qolgan 1 yil 4 oy ahloq tuzatish ishi jazosidan muddatidan oldin shartli ravishda ozod kilishgani uchun sudyadan minnatdorman, - dedi jazodan ozod bo‘lgan mahkum.
Ma’lumot o‘rnida aytib o‘tamiz, Toshkent shahar sudi va Toshkent shahar ma’muriy sudi tomonidan o‘tkaziladigan galdagi sayyor qabul esa 28 sentyabr kuni soat 10:00 da Yunusobod tuman fuqarolari uchun bo‘ladi.
