Finlyandiyada mol go‘shti narxi rekord darajada oshdi

Finlyandiyada mol go‘shtining ulgurji narxlari tarixiy eng yuqori darajaga yetdi. So‘nggi bir yil ichida butun mol go‘shti tana go‘shti narxi taxminan 25 foizga oshdi. Narxlarning keskin oshishining asosiy sabablari Yevropa bozorida mol go‘shti narxining oshishi, mahalliy ishlab chiqarishning kamayishi va xorijga tirik qoramol eksporti hisoblanadi, deb yozadi Azertadj.

Go‘shtni qayta ishlash kompaniyalari Yevropa bo‘ylab qoramol tanqisligi sezilayotganini aytyapti. Talab taklifdan sezilarli darajada yuqori va Afrika, Turkiya va Yaqin Sharqdagi xaridorlarning yuqori narxlari Finlyandiya qoramollari uchun raqobatni kuchaytiryapti. Shu munosabat bilan, Finlyandiya qayta ishlash kompaniyalari ham qoramollarni chet elga jo‘natmaslik uchun fermerlarga eksportchilar taklif qilgan narxlarda to‘lashga majbur.

Narxlarning oshishi iste’molchilarga ham ta’sir qila boshladi. Iyul va sentyabr oylari oralig‘ida chakana mol go‘shti narxlari taxminan 14 foizga oshdi. Hozirda bir kilogramm qiyma mol go‘shti 10 yevrodan 15 yevrogacha sotilyapti. Ba’zi iste’molchilar arzonroq bo‘lgani uchun tovuq go‘shtiga o‘tishni boshlagan.

So‘rovnomada qatnashganlarning fikriga ko‘ra, agar mol go‘shti narxi kilogrammiga 20 yevroga yetsa, mol go‘shtiga talab keskin pasayishi mumkin.

Mutaxassislarning ogohlantirishicha, agar iste’molchilar mol go‘shtidan ommaviy ravishda voz kechsa, mamlakat chorvachilik sanoati zaiflashishi, mahsulotning katta qismi talab yuqori bo‘lgan Yevropa bozorlariga ketishi mumkin.