8 mlrd so‘mdan ortiq davlat xaridlarida qonunbuzarlik holatlari aniqlandi - Raqobat qo‘mitasi

Raqobat qo‘mitasi tomonidan umumiy 8.1 mlrd so‘mdan ortiq davlat xaridlarida qonunbuzarlik holatlari aniqlanib, tegishli choralar ko‘rildi

Jumladan, Andijon viloyati misolida Qo‘mitaning topshiriq xatiga asosan Paxtaobod tumani 25-bolalar musiqa va san’at maktabi tomonidan o‘tkazilgan boshlang‘ich narxi 30 mln so‘mdan ortiq “Quyosh panel o‘rnatish ishlari” bo‘yicha tanlov savdosi o‘rganildi.

O‘rganish natijasida “Davlat xaridlari” va “Raqobat to‘g‘risida”gi Qonunlar talablari buzilgani, xususan, savdolarda manfaatdor yoki affillangan shaxslarning ishtiroki aniqlanib, belgilangan tartibda ish qo‘zg‘atildi hamda moliyaviy va ma’muriy jarimalar qo‘llanildi.

Buxoro viloyati misolida Hududiy boshqarma tomonidan Romitan tuman tibbiyot birlashmasi buyurtmachiligida o‘tkazilgan tender savdosi “Raqobat to‘g‘risida” va “Davlat xaridlari to‘g‘risida”gi Qonunlar talablariga muvofiqligi yuzasidan o‘rganib chiqildi.

O‘rganish davomida 4,6 mlrd so‘mlik 20 ta lot bo‘yicha baholash mezonlariga muvofiq bo‘lmagan holda qaror qabul qilingani, ishtirokchilarga nomuvofiq baho berilgani aniqlandi.

Aniqlangan qonunbuzilish holatlari yuzasidan Vazirlar Mahkamasining 225-sonli qaroriga muvofiq Romitan tuman tibbiyot birlashmasiga nisbatan ish qo‘zg‘atilib, tegishli ko‘rsatma berildi.

Jizzax viloyati misolida Hududiy boshqarma tomonidan davlat xaridlarida raqobat talablariga rioya etilishi yuzasidan doimiy monitoring amalga oshirilmoqda.

Monitoring davomida Jizzax viloyat hokimligi Yagona buyurtmachi xizmati injiniring kompaniyasi tomonidan 1,09 mlrd so‘mlik master-reja ishlab chiqish tanlov savdosida “Raqobat to‘g‘risida”gi Qonunning 29-moddasi talablari buzilganligi va qonunchilikda belgilangan tartibga rioya etilmagani qayd etildi.

Natijada belgilangan tartibda ish qo‘zg‘atilib, qonunbuzarliklarni bartaraf etish bo‘yicha ko‘rsatmalar berildi va mas’ullarga ma’muriy bayonnomalar rasmiylashtirildi.

Namangan viloyati misolida Hududiy boshqarma tomonidan ijtimoiy tarmoqdagi murojaat asosida Namangan olimpiya va paralimpiya sport turlariga tayyorlash markazi tomonidan 350 mln so‘mlik banner mahsulotlari xaridi bo‘yicha o‘tkazilgan tanlov savdosi o‘rganib chiqildi.

O‘rganish davomida tanlovda ishtirok etgan “ART AGENCY CENTER” MCHJ va “PIXEL BRANDWAVE” MCHJ afillanganlik alomatlari — ya’ni huquqiy va faktik manzillarining bir xilligi — aniqlandi. Bu holat “Davlat xaridlari to‘g‘risida”gi Qonunning 23-moddasi 13-xatboshi talablariga zid hisoblanadi.

Natijada tanlovda qonunbuzilish holatlari qayd etildi va buyurtmachi tomonidan tanlov bekor qilindi. Qonun buzilishining oldi olindi.

Navoiy viloyati misolida Hududiy boshqarma tomonidan Respublika tez tibbiy yordam markazi Navoiy viloyati filialida o‘tkazilgan 950 mln so‘mlik “V” klassdagi reanimobil xaridi bo‘yicha tanlov savdosi qonunchilikka muvofiqligi yuzasidan o‘rganildi.

O‘rganish davomida tanlov hujjatlari va bayonnomalarda mezonlar o‘rtasida nomuvofiqlik mavjudligi, ishtirokchilar to‘liq baholanmagani va ayrim talablar raqobatni cheklovchi xususiyatga ega ekani aniqlandi.

“Raqobat to‘g‘risida”gi Qonunning 29-moddasi buzilganligi alomatlari asosida belgilangan tartibda ish qo‘zg‘atilib, filialga bajarilishi majburiy bo‘lgan ko‘rsatma berildi hamda mas’ul shaxslarga nisbatan ma’muriy bayonnoma rasmiylashtirilib, sud organlariga yuborildi.

Qashqadaryo viloyati misolida Hududiy boshqarma tomonidan olib borilgan o‘rganish natijasida G‘uzor tuman obodonlashtirish boshqarmasi tomonidan 1,1 mlrd so‘mlik “Avtogreder” texnikasi xaridi bo‘yicha tanlovda qonunbuzilish holatlari aniqlandi.

Jumladan, baholash me’yorlari belgilanmagan va hujjatlar asossiz ravishda past baholangan.

Natijada, qonunbuzarliklar uchun ish qo‘zg‘atilib, mas’ul shaxsga ma’muriy jazo qo‘llanildi.

Qonun ustuvorligi va ochiq raqobat muhitini ta’minlash maqsadida davlat xaridlari sohasidagi bu kabi holatlar ustidan tizimli monitoring ishlari davom ettiriladi.