Япония Россияга вакцина ва бошқа кўплаб товарларни сотишни тақиқлади

Япония Россия билан савдога янги чекловлар киритди. Бу давлат ташқи ишлар вазирлиги янги санкцияларни Украина атрофидаги халқаро вазият ва унинг «тинчликни таъминлаш»га қўшган ҳиссаси билан изоҳлайди.

3 февралдан бошлаб Россияга вакциналар ва тиббий асбоб-ускуналар сотишга тақиқ жорий этилди. Шунингдек, роботлар, радиоактив материаллар ва ядровий иншоотлар, нефть ва газ қидируви учун ускуналарни экспорт қилиш тақиқланади. Рўйхатда портловчи моддаларни аниқлаш учун ускуналар, портатив генераторлар, лазерли пайвандлаш машиналари ҳам мавжуд.

Умуман олганда, экспорт чекловлари 49 та ташкилотга таъсир қилади. 22 шахс ва учта ташкилотга (Иркут корпорацияси, "Авангард Москва" машинасозлик заводи ва "КамАЗ") нисбатан шахсий санкциялар кенгайтирилмоқда.

Чекловларга дучор бўлганлар орасида Россия Федерацияси Президенти ҳузуридаги Болалар ҳуқуқлари бўйича вакил Мария Лвова-Белова, файласуф Александр Дугин, «КамАЗ» ЁАЖ бош директори Сергей Когонин, шунингдек, Сулаймон Керимовнинг қариндошлари бор.