Янги технологиялар сабаб смартфонлар истеъмолдан чиқарилади
Давосда бўлиб ўтган Жаҳон иқтисодий форумида Nokia корпорациясининг бош директори Пекка Лундмарк олтинчи авлод тармоқлари 2030 йилларда бозорларга чиқишини маълум қилди.
Шунингдек, финландиялик тадбиркорнинг таъкидлашича, яқин келажакда смартфон “энг кенг тарқалган интерфейс» бўлмай қолади.
CNBC телеканалининг маълум қилишича, Лундмарк ўн йиллик охирида инсоният оддий телефонлардан воз кечишни бошлайди, деган тахминни илгари сурган. Уларнинг ўрнига кундалик ҳаётимизга янада қулай ва замонавий қурилмалар кириб келади.
Бундай қурилмалар ҳақида гапирар экан Nokia раҳбари ақлли кўзойнаклар ва фойдаланувчилар танамизга тақиб юрадиган бошқа девайсларни санаб ўтган.
«Бундай қурилмаларнинг кўпчиллиги танамизга ўрнатилади», – деган у.
Анжуманда сўзга чиққан Google компаниясининг молиявий директори Рут Порат эса қўшимча реаллик технологиялари кўплаб маъиший муаммоларни ҳал қилишини таъкидлаган. Унинг башорат қилишича, «матнларни кўзойнак экранига ўтказиш қобилиятига эга ақлли кўзойнаклар кенг тарқалади».
