Янги экспресс автобусда ёнғин содир бўлди

Бугун, 26 ноябрь куни соат 15:02 да Тошкент шаҳар М.Улуғбек тумани М.Улуғбек кўчасида экспресс йўналишида Машинасозлар бекатига ҳаракатланиб кетаётган “Mercedes-Benz” русумли автобусда ёнғин содир бўлди. Бу яқинда йўлга қўйилган экспресс автобуслардан бири эди.

Ёнғин тафсилотлари ҳақида ФВВ ахборот хизмати хабар берди.

Хабарда айтилишича, 2 та ёнғин-қутқарув экипажи воқеа жойига етиб борган вақтда ёнғин ҳайдовчи томонидан бирламчи ёнғин ўчириш воситалари орқали бартараф этилгани маълум бўлган.

Ёнғин натижасида автобуснинг мотор қисми ёниб зарарланган.

Ҳодиса оқибатида тан жароҳати олган ва ҳалок бўлганлар йўқ.

Ҳозирда ёнғин сабаби ва моддий зарар миқдори аниқланмоқда, дейилади хабарда.