Хитойда "пахта иши": 570 мингдан ортиқ уйғурлар мажбурий меҳнатга жалб қилинган

Хитойнинг шимоли-ғарбий ҳудудида жойлашган Шарқий Туркистон (Шинжон) минтақасида юз минглаб уйғур миллатига мансуб ишчилар пахта теришга мажбур қилинмоқда, дейилади Вашингтондаги «Global Policy Center» тадқиқот маркази томонидан чоп этилган хабарда.

Ушбу хабарда айтилишича, Шарқий Туркистонда 2018 йилнинг ўзида 517 мингдан кўпроқ уйғур миллатига мансуб одамлар пахта теришга мажбур қилинган.

Шарқий Туркистон дунёнинг пахта етиштириш марказларидан бир бўлиб, бу ерда ҳар йили дунё пахтасининг 20 фоиздан кўпроғи етиштирилади. Бу ерда ишлаб чиқарилган пахта хом-ашёсидан Nike, Gap ва Adidas каби жаҳоннинг машҳур брендлари ҳам фойдаланишади.

Жаҳондаги инсон ҳуқуқларини ҳимоя қилувчи ташкилотлар берган маълумотларга кўра, айни пайтда Шарқий Туркистонда камида 1 миллион киши лагерларда тутқинликда сақланмоқда. Хитой ҳукумати бу лагерларни касб-ҳунар ўргатиш марказлари деб атаб, ушбу лагерларни ҳимоя қилиб келмоқда.

15 декабрь куни Хитой ҳукумати Шарқий Туркистондаги уйғурларнинг мажбурий меҳнатга жалб қилингани тўғрисидаги айбловларни қатъиян рад этди ва лагерлардаги ўқув дастурлари, иш режалари ва яхши таълим минтақадаги экстремизмни йўқ қилишга ёрдам берганини айтди.

«Global Policy Center» тадқиқот марказининг мажбурий меҳнат ҳақидаги хабарига изоҳ сўралганда Хитой ҳукумати шундай жавоб берган:

«Шинжондаги барча миллатларга мансуб ишчилар ўзларининг касбларини ихтиёрий равишда танлашади ва корхоналар билан меҳнат шартномаларини имзолашади».

Шарқий Туркистонда етиштирилган пахтанинг учдан бир қисмини АҚШ компаниялари сотиб оларди. Шу ойнинг бошида АҚШ ҳукумати “Шарқий Туркистон ишлаб чиқариш ва қурилиш корпуси” томонидан ишлаб чиқарилган пахтани ўз ҳудудига импорт қилишни тақиқлаб қўйди.