Туркияда 200тадан кўпроқ меҳмонхона сотувга қўйилди

Туркиянинг энг оммавий савдо сайти Sahibinden.co маълумотларига кўра, охирги вақтда Анталияда 234та меҳмонхона сотувга қўйилган.

Сотувга қўйилган меҳмонхоналардан энг қимматининг нархи 585 млн турк лирасини (85 млн доллар атрофида) ташкил қилади. Қонакли туманида жойлашган 5 юлдузли меҳмонхона 330та хонага эга бўлиб, унда бир вақтда мингга яқин киши жойлаштирилиши мумкин.  

Энг арзон объект 5,2 млн турк лирасига (750 минг доллар) баҳоланган.

Аланянинг туристик операторлари уюшмаси вице-президенти Меҳмет Доҳоўғлунинг айтишича, аввал ҳам меҳмонхоналар сотилган, бироқ бундай кўп сонда эмас.

“Ўрта ер денгизи ҳудудидаги кўплаб сайёҳлик объектларининг сотилишига асосий сабаб пандемия юзага келтирган иқтисодий инқироз ҳисобланади. Йўқса ким даромад келтирадиган, бандликни таъминлайдиган бизнесини сотган бўларди?”, деб айтган Доҳоўғлу.

Турк меҳмонхоналари пандемия сабабли сайёҳлар оқими 80 фоизга камайиб кетгандан кейин қийинчилик сеза бошлаган. Туркия отельерлари федерациясининг баҳолашича, 2021 йилда Туркияга 25-30 млн хорижлик сайёҳ келиши мумкин. Ваҳоланки, 2019 йилда сайёҳлар сони 50 млнга яқинни ташкил қилган.