Тошкентда автобус кўчани ёритувчи бетон устунга бориб урилди
Ҳодиса 12 октябрь куни 17:50 атрофида Навоий кўчасининг Hyatt Regency меҳмонхонаси олдида рўй берган
– Ҳайдовчи машина билан тўқнашув юз беришининг олдини олиш мақсадида рулни буриб юборган
– 5 нафар йўловчи енгил тан жароҳати олган
12 октябрь куни соат тахминан 17:50 атрофида Навоий кўчасининг Hyatt Regency меҳмонхонаси олдидан ўтган қисмида 155-йўналишда Чорсу-Янгиобод бўйлаб ҳаракатланувчи Isuzu автобуси кўчани ёритувчи бетон устунига бориб урилган. Бу ҳақда Тошкент шаҳар ИИББ матбуот хизмати хабар қилди.
Автобус ҳайдовчиси 34 ёшли Сарвар М.нинг сўзларига кўра, у олдидан кетаётган ва светофорнинг тақиқловчи чироғига бирдан тўхтаган машина билан тўқнашув юз беришининг олдини олиш мақсадида рулни буриб юборган.
Ҳайдовчининг қўшимча қилишича, воқеа юз берган вақтда автобус салонида 10-12 йўловчи бўлган. Уларнинг беш нафари енгил тан жароҳатларини олган ва саломатлигини текшириш учун шифохонага олиб борилган.
Manba: uz24. uz
