Қиз педикюр сабаб оёқларидаги бармоқларидан айрилди (фото)

Австралия фуқароси Таиландда жойлашган бир курортга ташриф буюриб, "балиқча педикюр” деб номланган экзотик терапевтик усулни синаб кўрди ва ўнг оёғидаги барча бармоқларини йўқотди. Бу ҳақда “Метро” хабар бермоқда.

Бу ҳодиса 2010 йилда содир бўлган эди. Тўрт йил олдин, 2006 йилда эса австралиялик қиз аллақачон оёғидаги бир бармоғини йўқотганди. Бунга эса шиша синиғини босиб олганидан сўнг танасига тушган инфекция сабаб бўлганди.

Таиландда у кенг тарқалган пардоз усулини синаб кўришга қарор қилди, бу жараёнда у оёқларини ундаги ўлик терини ейиб юборадиган кичик балиқчалар билан тўлдирилган аквариумга тушириши зарур эди. У шундай қилди ҳам. Кейинчалик маълум бўлишича, янги инфекциянинг сабаби аквариумдаги ифлос сув бўлган. Австралиянинг Перт шаҳрига қайтгач қиз ўзини ёмон ҳис қила бошлаган. Текширувлардан сўнг қизга остеомиелит ташхиси қўйилган.

2012 йили қизнинг ўнг оёғининг бош бармоғи ампутация қилинганди. Аммо инфекция белгилари қайтиб келди ва келгуси беш йил мобайнида у яна тўртта бармоғини олдириб ташлашга мажбур бўлди.

Энг сўнгги ампутациядан сўнг қиз Инстаграмдаги саҳифасига бармоқларидан ажралган оёғининг расмини жойлаштирди. Унинг айтишича, қиз шу йўл билан бошқа одамларни экзотик процедуралар хавфи ҳақида огоҳлантирмоқчи экан.