«Навбаҳор», «Насаф» ва «Пахтакор» жаҳоннинг энг кучли клублари рўйхатига киритилди

Халқаро футбол тарихи ва статистикаси федерацияси (IFFHS) дунёнинг энг кучли клублари янги рейтингини эълон қилди.

Сайёрамиздаги 5 та қитъанинг 75 та миллий чемпионатлари қатнашчилари бўлган 504 та жамоа номи келтирилган мазкур рўйхатга клубларнинг 2023 йил 1 июлдан 2024 йил 30 июнгача бўлган даврда қайд этган натижалари асос қилиб олинган.

Дунёнинг энг зўр жамоалари рейтингини Европанинг гранд клублари бошқариб турибди. Биринчи поғонада УЕФА Чемпионлар лигасининг амалдаги ғолиби “Реал” бормоқда. Испания грандининг бир йил давомида 371 балл тўплагани қайд этилган.

Янги рейтингнинг дастлабки ўн бир поғонасини фақат “кўҳна қитъа” жамоалари – “Реал”дан кейин “Манчестер Сити”, “Байер”, “Аталанта”, “Боруссия” (Дортмунд), “Атлетико” (Мадрид), “Бавария”, “Барселона”, “Арсенал”, “Интер” ҳамда ПСЖ эгаллаган.

Бошқа қитъа вакилларидан энг юқори поғонада Бразилиянинг “Палмейрас” жамоаси жой эгаллади.Мазкур клуб умумий рейтингда парижликлардан кейин 12-қаторда жойлашган.

Осиё клублари орасида энг юқори ўринга Саудия Арабистонининг амалдаги чемпиони, таркибида бир қатор жаҳон футболи юлдузлари тўп тепадиган “Ал-Ҳилол” жамоаси лойиқ топилиб, 40-қаторга ўрнашди.

Криштиану Роналду ўйнаётган “Ал-Наср” жамоаси қитъамизда иккинчи, дунё рейтингида эса 71-ўриндан жой олди.

“Топ-500” рейтингида Ўзбекистоннинг учта жамоаси номи қайд этилган.

Биз учун қувончлиси, улар орасида “Навбаҳор” ҳам бор. Жамоамиз 83,75 балл жамғарган ҳолда, IFFHS рўйхатида 221-ўринни эгаллаб турибди.

Мамлакатимиз клублари орасида “Насаф” (Қарши) 88,25 балл жамғарган ҳолда, рейтингнинг 201-қаторида қайд этилган бўлса, “Пахтакор” (Тошкент) 51 балл тўплаган ҳолда, 496-поғонадан жой олди.

“Навбаҳор” ПФК матбуот хизмати.