Исроил Эронга «катта ва қаттиқ» зарба беришга тайёрланмоқда

❕ Исроил армияси 1-октабр куни амалга оширилган ракета ҳужумларига жавобан Эронга қарши «катта ва қаттиқ» зарба беришга тайёрланмоқда, деб хабар беради Исроил давлат телевидениеси КАN, Haaretz газетаси ва армия радиоси.

Хабарларда айтилишича, Исроил армияси Исроилда жиддий вайронагарчиликлар қайд этилмаганига қарамай, Эроннинг баллистик ракета ҳужумига кучли жавоб тайёрламоқда. Хабар қилинишича, Исроил бу ҳодисани кескин жавобсиз қолдирмоқчи эмас.

Шунингдек, Исроил Эронга қарши коалициянинг бошқа аъзоларидан, шунингдек, Эрон таҳдидини ўз муаммоси деб ҳисоблайдиган давлатлардан халқаро ёрдам кутаётгани хабар қилинган.

Бундан ташқари, бугун исроиллик ҳарбийлар ва иттифоқчилардан бирининг вакиллари ўртасида учрашув бўлиб ўтди ва Исроил томонига кўра, АҚШ Эронга қарши жавоб чораларида фаол иштирок этади, деб ёзади нашрлар.

1 октабр куни Эрон инқилобий қўриқчилари корпуси Исроилга ўнлаб баллистик ракеталарни учиргани ҳақида эълон қилди. Кўп ўтмай, бутун мамлакат бўйлаб, жумладан Тел-Авивда ҳаво ҳужуми сиреналари янгради.

Исроил Бош вазири Бенямин Нетаняху видеомурожаатида Эрон «катта хатога йўл қўйгани» ва «бунинг учун тўлаши»ни айтди.