НАТО Германиядаги Гайленкирхен авиабазасида хавфсизликни кучайтирди
Германия ғарбидаги Гайленкирхендаги НАТО ҳаво базасида эҳтимолий таҳдид туфайли хавфсизлик чоралари кучайтирилди. Бу ҳақда Германиянинг Zeit газетаси база вакилига таяниб хабар берди.
Эҳтиёт чораси сифатида, муҳим операцияларда иштирок этмаган ходимлар уйларига жўнатилди. Разведкадан таҳдид эҳтимоли ҳақида маълумот олинган, тафсилотлар келтирилмаган.
"Бу ташвишга сабаб эмас, шунчаки муҳим операцияларимизни давом эттиришимиз учун эҳтиёт чораси", деди ҳаво базаси вакили.
Гайленкирхен Нидерландия билан чегара яқинида жойлашган. Awacs эрта огоҳлантириш тизими билан жиҳозланган НАТО самолётлари шаҳар аэродромида жойлашган.
14 август куни Германия Кёльн туманларидан биридаги Бундесвер казармасида эҳтимолий қўпорувчиликни текшираётгани маълум бўлди. Саботаж Кёльн аэропорти яқинидаги объектда содир бўлиши мумкин эди, у ерда 4,3 минг ҳарбий хизматчи ва 1,2 минг тинч аҳоли хизмат қилади. Бундесвер тергов олиб бораётганини тасдиқлади. Bloomberg агентлигига кўра, Германия Россияни икки ҳарбий базада қўпорувчилик уюштирганликда гумон қилмоқда.
Апрель ойида Баварияда Россия ва Германия фуқаролигига эга икки киши ҳибсга олинган эди. Улар портловчи ҳаракатларга тайёргарлик кўриш ва Россия учун жосуслик қилишда гумон қилинмоқда.
