Мельбурнда карантин чоралари юмшатилди: энди аҳоли ўз уйидан 25 километр узоққача бориши мумкин

Австралиянинг катталиги бўйича иккинчи шаҳри бўлган Мельбурнда карантин чекловлари юмшатилди. Ҳозирда бу шаҳарда янги касалланиш ҳолатлари ва даволанаётган беморлар сони камайишда давом этмоқда.

Якшанба кунидан бошлаб Мельбурн аҳолиси таълим олиш ва ҳордиқ чиқариш учун кўчада ҳаракатланиш бўйича таъқиқлардан озод бўлди. Олдинги чекловларга биноан шаҳар аҳолиси ўз уйидан беш километргача узоққа боришлари мумкин бўлган бўлса, энди бу масофа 25 километргача узайтирилди. Шунингдек, 10 тагача бўлган одамларнинг тўпланишларига, теннис ва голф ўйинлари қайта бошланишига рухсат берилди.

Мельбурн шаҳри жойлашган Виктория штатида шанба куни иккитагина янги касалланиш ҳолати қайд этилган ва ҳеч қандай қурбон бўлмаган.

18 октябрь ҳолатига кўра, Виктория штатида атиги 137 та касал қолган бўлиб, уларнинг 12 нафари касалхонада даволанмоқда. Бирорта бемор оғир аҳволда эмас.

Викторияда карантин қоидалари енгиллаштирилиб борилади. Иккинчи ноябрдан дўконлар, барлар ва ресторанлар қисман очилади.