Ўзбекистон ва Тожикистон терма жамоалари мураббийлари матбуот анжуманида иштирок этди
Ўзбекистон футзал терма жамоаси Осиё кубоги учинчи ўринчи учун баҳсда Тожикистон термасига қарши баҳс олиб боради. Учрашув олдидан икки жамоа бош мураббийлари матбуот анжуманида иштирок этди
Ўзбекистон футзал миллий терма жамоаси бош мураббийи Хосе Венансио Лопес:
— Ўйлайманки, икки жамоа иштирокидаги навбатдаги учрашув ҳам тенг курашларга бой бўлади. Чунки Тожикистон билан кўп ўйинлар ўтказганмиз. Уларда рақобатбардош, ҳужумкор жамоа бор, керак вақтда агрессив бўла олишади ва жуда яхши ҳимояланишади. Бироқ ғалаба қозонишимизга ишончим комил.
Биринчи навбатда оғир учрашувдан сўнг эртанги баҳсга жисмоний ва руҳий жиҳатдан тайёрланишимиз, кўпроқ энергия йиғишимиз ва ўйингача тикланишимиз керак.
Ушбу Осиё кубогидан мамнунман. Турнир шуни кўрсатдики, Осиёда футзал даражаси анча ўсган. Ўйлашимча, ОФК ёшлар жамоалари ўртасидаги турнирларга кўпроқ эътибор қаратиши лозим. Ўзбекистон мезбонлик қиладиган Жаҳон чемпионати ушбу қитъада футзалнинг янада ривожланишига ёрдам беради.
Тожикистон терма жамоаси бош мураббийи Паирав Воҳидов
— Аввало, Таиландга келиб, бизни қўллаб-қувватлаган мухлисларга ташаккур айтмоқчиман. Ўзбекистон билан ўйинга келсак, бу жамоа билан жуда кўп ўйин ўтказдик. Жамоанинг кучли томонлари ҳақида яхши биламиз. Эртанги баҳсда яхши ўйин кўрсатиб ғалаба қозонишга ҳаракат қиламиз. Футзалчиларимиз учрашувга қадар тикланиши керак. Яхши натижага эришамиз, деб ўйлайман.
Турнир давомида Осиёнинг энг етакчи жамоаларига қарши ўйинлар ўтказдик. Бу бизга яхши тажриба бўлди ва унинг самарасини Жаҳон чемпионатида кўрсатамиз.
