Машина аёлга дастёрми?
Аёл ҳар томонлама ўзини кўрсата олади. Авваллари аёл фақатгина уй бекаси, фақатгина оналик вазифасини уддаласа бўлгани деган қарашлар, шу билан бирга бундай муҳитга кўникувчилар сони кўп эди. Ҳозирги кунда эса ривожланиб бораётган бундай даврда аёл киши ҳар томонлама билимини, ўз тажрибаларини бемалол омма олдида кўрсата олади, барча ишга улгуришга ҳаракат қилади. Нега энди автомобиль бошқаришда иккиланиши керак, нега энди қўрқув бўлиши керак, нега энди аёл киши автомобил бошқарганида "Одамлар нима деб ўйлайди?", деган хавотирга тушиши керак?!
Машинага узоқни яқин қиладиган, кўпгина қулайликларни ўзида жамлаган бир аёлнинг "дастёри" сифатида қараш, балки, тўғри бўлар! Психологларнинг фикрича, автомобиль бошқаруви аёлларнинг ўзига бўлган ишончини ортиради, шу билан бирга ҳар ишда эҳтиёткорликни ўзида мужассамлаштиради. Ахир автомобил ҳозирги кунда оддий эҳтиёжга айланган бўлса. Аёл киши айни дамда меҳрибон, жонкуяр онадир. Нима учун бу ҳолатга бир тарафлама қарашимиз керак. Катта шаҳарларда фарзандларини боғчага, мактабга олиб бориш ҳозирги кунда аёлларнинг зиммасига тушган. Оиланинг кам-кўстини тўдирадиган, оила суянчи ҳам эркак киши ва у ҳар доим уйда бўлавермайди. Бундай вазиятларда аёл кишининг автомобил бошқариши айни мудаодир!
Лазиза Йўлчиева, Ўз ЖОКУ талабаси
