Коронавирус ўзбекни дабдабабозликдан қутқара оладими?!
Сўнгги кунларда ижтимоий тармоқларни “ёндираётган” хабарлардан бири шубҳасиз “яшил” ҳудудларда ўтаётган 30 кишилик тўйлар бўлмоқда. Қолдирилаётган “пост”лардан билиш мумкинки, кўпчилик тўйлардаги бундай “чегара” карантиндан кейин ҳам сақланиб қолишини хоҳламоқда.
“Уч йил илгари катта ўғлимни уйлантираман деб бўғзимгача қарзга ботгандик, — дея фикр қолдирган бир аёл. — Яқинда “барибир ҳеч ким раҳмат айтмайди” дея иккинчи ўғлимни карантин талабларига риоя қилган ҳолда уйлантирдик. 30 кишилик тўйга “айтмадинг” деб ҳеч ким хафа ҳам бўлмади. Аксинча, кўпчилик “кимга керак дабдаба, қайтанга яхши қилибсилар” дейишди”.
“Яқин қариндошим ҳовлисида ихчамгина тўй ўтказди, — дейди яна бир аёл. — Ҳамма хурсанд бўлди. Тўйдан иқтисод қилинган пулга эса янги оиланинг барча кам-кўстини тўлдирдик. “Ким ўзарга” тўй қиламиз деб, ўзимизни ўзимиз қийнаб юрган эканмиз-да”.
“Кузга тўй қилишни мўлжаллаб, йиғиниб қўйгандик, — дея “пост” қолдирган яна бир аёл. — Энди ўғлим“ойижон тўйни тезлаштиринг, пандемияда камхарж қилиб ўтказиб юборайлик. Тўйдан ортган пулга дадам билан сизни ҳажга жўнатаман” деб ҳоли-жонимизга қўймаяпти. Бу гапни эшитиб рости йиғлаб юбордим. Қаранг, ёшлар ҳам тўйни камхарж қилиб ўтказишимизни хоҳларкан, лекин биз катталар, айниқса, аёллар ҳою-ҳавас деб бор будимизни сарфлаб, кейин қаттиқ нон кавшаб ўтираканмиз".
Хуллас, қолдирилган “пост”ларнинг барчаси ижобий. Одамлар ҳатто Олий Мажлис Сенатининг “Тўйлар, оилавий тантаналар, маърака ва маросимлар ўтказилишини тартибга солиш тўғрисида” ўтган йили эълон қилган, яъни тўйларга 200 кишидан ортиқ меҳмон чақирмаслик ҳақидаги қарорини ҳам бунчалик хурсандчилик билан қарши олмаган эди.
Яқинда ижтимоий тармоқлар орқали аҳолининг 30 кишилик тўйга муносабати ўрганилди ва иштирокчиларнинг 90 фоизи шундай ихчам тўйларни қўллаб-қувватлаган. Тўй тараддудида юрганларнинг кўпчилиги шу кунларда тезроқ тўйини ўтказишга шошилаётганини ҳам кўча-куйда эшитябмиз. Ёшлар ҳам бунга қаршилик қилаётгани йўқ.
Қаранг, тўйларни шунчалик ихчам, дабдабабозлик ва исрофгарчиликларсиз ўтказишни ҳамма хоҳларкан-у, аммо қўни-қўшни, “душманлар”нинг кўзи, гапи, “хўжакўрсин” учун 500-600 кишидан ортиқ қорни тўқларга дастурхон ёзаверар эканмиз.
Тўй қиламан деб қарзга ботиб, эртаси куни ота ёки куёв боланинг хорижга отланганини кўп эшитганмиз. Ҳатто бунинг ортидан жиддий касаллик орттириб, ҳою-ҳавасимиз қурбони бўлаётганлар ҳам борлиги ҳақиқат. Шундай нохуш хабарларни эшитганимда ҳар гал маърифатпарвар олим Абдулла Авлонийнинг юз йиллар олдин айтган гапини эслайвераман: “Ўзбек халқини тўй балосидан қутқаринг”.
Жаҳонгир ЗИЯЕВ, ЎзМТДП депутати
