Жонсон Зеленскийга Россияга қарши халқаро иттифоқ тузишни таклиф қилди
Буюк Британия бош вазири Борис Жонсон Украина президенти Владимир Зеленскийга Россияга қарши янги халқаро иттифоқ тузишни таклиф қилди, деб хабар бермоқда Corriere Della Sera манбаларга таяниб. Жонсон ўз ташаббусини 9 апрель куни Киевда Украина президенти билан бўлиб ўтган учрашувда маълум қилди.
Нашрнинг ёзишича, Британия бош вазири Европа Иттифоқига (ЕИ) муқобил бўладиган “сиёсий, иқтисодий ва ҳарбий иттифоқ” яратмоқчи. Унинг фикрича, янги иттифоқ Европа Иттифоқи сиёсатидан, шунингдек, Германиянинг Россиянинг “ҳарбий тажовуз”ига жавобан ҳаракатларидан норози мамлакатларни бирлаштиради. Иттифоққа Буюк Британия бошчилик қилади, унга Украина, Польша, Эстония, Латвия ва Литва, кейинроқ эса Туркия ҳам кириши керак.
Corriere Della Sera аниқлик киритишича, Украина Британия бош вазири ташаббуси юзасидан ҳалигача ўз позициясини эълон қилгани йўқ. Нашрнинг ёзишича, Зеленский 23 июнь куни бўлиб ўтадиган ЕИ саммитини кутмоқда, унда Украинани ташкилотга аъзоликка номзод сифатида тан олиш масаласи ҳал қилинади. ЕИ қабул қилган қарор Киевнинг Лондон таклифига қандай муносабатда бўлишига таъсир қилиши мумкин, деб ёзади газета.
