Ҳаракатланаётган "Matiz" эшигига осилган фуқаро жаримага тортилди

Интернет тармоғида тарқалган суратда автомобил йўловчиси эшикка осилиб, ўз ҳаёти учун хавф туғдиргани акс этган. Тошкент шаҳар ИИББ ходимлари қоидубарлик ҳақидаги хабарни эътиборсиз қолдиришмади.

Аниқланишича, ҳолат 2021-йил 9-октябр куни тахминан соат 14.00 да рўй берган. “Матиз” русумли автомобилни (давлат рақами 01 Й 687 Я) ишончнома асосида 1999-йилда туғилган Жасур Х. бошқарган, суратдаги йўловчи эса – 1995-йилда туғилган Умаржон Э. бўлган.

Йўловчига нисбатан Ўзбекистон Республикаси Маъмурий жавобгарлик тўғрисидаги кодексининг 138-моддаси 4-қисми (“Пиёдалар ва йўл ҳаракати бошқа иштирокчиларининг йўл ҳаракати қоидаларини бузиши”) бўйича маъмурий баённома расмийлаштирилди. Автомобил ҳайдовчиси ҳам жаримага тортилди.