Германия Қатар билан газ етказиб бериш борасида келиша олмади
Бунинг ўрнига Қатар томони Италия билан ҳамкорликни афзал кўрди.
Бу ҳақда Deutsche Wirtschaftsnachrichten Италиянинг Eni компанияси томонидан ресурс етказиб бериш ҳақидаги маълумотларга асосланиб хабар берди.
Март ойида Германия Иқтисодиёт вазири Роберт Хабек Россия газининг ўрнини босувчи газни топиш мақсадида Яқин Шарққа ташриф буюрди. У ҳатто Қатар ҳукумати билан учрашувдан сўнг Доҳа Германияга кўпроқ газ етказиб беришга тайёрлигини айтди. Бироқ Ҳабекга ҳамроҳлик қилаётган компания вакиллари ҳали Қатар билан келишувга эриша олишмади ва Ҳабекнинг ўзи ўтган ҳафта Қатарнинг “яхши таклиф билан чиқиш”ни истамаганидан шикоят қилди.
Шу билан бирга, Италиянинг Eni компанияси 2022 йил бошида Жазоир, Конго ва Мисрда "янги газ шартномаларини" таъминлади ва ёзда дунёдаги энг йирик ЛНГ лойиҳасининг бир қисми бўлган Қатарнинг North Field East иншоотига қўшилди.
Германиядан фарқли ўлароқ, Италия Қатар билан анчадан бери ҳамкорлик қилиб келмоқда ва бу мамлакатдан суюлтирилган газнинг энг йирик импортчиси ҳисобланади.
